Ölkəmizin Malayziyadakı səfirliyi “Azərbaycan-Malay danışıq kitabçası” adlı vəsait nəşr etdirib.
Səfir Qaley Allahverdiyevin müəllifliyi ilə nəfis şəkildə tərtib edilmiş kitabça Azərbaycan və Malay dillərini öyrənməyə başlayanlar, xarici dillərə maraq göstərənlər, eləcə də iki ölkəyə qarşılıqlı səfərlər edəcək turistlər üçün nəzərdə tutulub.
Vəsaitin Malayziyanın qabaqcıl kitabxanalarına, təhsil müəssisələrinə, müvafiq dövlət qurumlarına, habelə bu ölkənin aparıcı turizm təşkilatlarına göndərilməsi planlaşdırılır.
Kitabın təqdimatı ilə bağlı səfir Q.Allahverdiyev bildirib: “Məlum olduğu kimi, lüğətlər, danışıq kitabçaları müxtəlif dillərə, mədəniyyətlərə mənsub xalqlar arasında ilkin ünsiyyətin, təmasın başlanğıc nöqtəsi hesab olunur. Bu gün Azərbaycan və Malayziya xalqları arasında dostluq münasibətləri, eləcə də siyasi, iqtisadi, mədəni-humanitar və digər sahələrdə qarşılıqlı səmərəli əlaqələr iki ölkənin dövlət və hökumət başçılarının güclü iradəsi nəticəsində yüksək səviyyədə davam etdirilir. Bu yüksək münasibətlərə mümkün olduğu qədər müxtəlif layihələrlə töhfə vermək isə hər şeydən əvvəl səfirliyin vəzifə borcudur. Yeni çap olunan vəsaiti də məhz Azərbaycan-Malayziya dostluğuna ərməğan edirik.
Qeyd etmək istərdim ki, danışıq kitabçamız Azərbaycan və Malay dillərində bu səpkidə yazılmış ilk vəsait hesab oluna bilər. Kitabçanı nəşrə hazırlayarkən, oxucu kütləsinin ən müasir, ən zəruri tələbləri nəzərə alınıb. Kitabın əvvəlində Malay dilinin əsasları barədə məlumat verilir, dilin qrammatik xüsusiyyətləri haqqında xülasə təqdim olunur, daha sonra isə spesifik sahələr üzrə danışıq nümunələri göstərilir. Hazırda məlum olduğu kimi, COVID-19 pandemiyasına görə, beynəlxalq səviyyədə turizm ciddi surətdə məhdudlaşdırılıb. Lakin pandemiya təhlükəsi aradan qaldırıldıqdan sonra vəsaitimizin Azərbaycandan və Malayziyadan olan turistlər üçün faydalı mənbə olacağını söyləmək olar.
Hesab edirəm ki, bu vəsait həmçinin diplomatik sahədə çalışan gənclər və ya bu sahəyə maraq göstərənlər üçün əlavə bir cəhəti də özündə əks etdirir. Belə ki, kitabın sonunda oxuculara “Diplomatik terminlər lüğəti” başlıqlı hissə də təqdim olunub”.

Tehsil-press.az