Kanada hakimiyyəti çərşənbə axşamı gecə yarısından (Bakı vaxtı ilə saat 08:00-dan) tam peyvənd olunmuş əcnəbilər üçün dövlət sərhədlərini açmağa qərar verib.
DİN-in bəyanatında deyilir ki, Kanadaya səfərdən azı 14 gün əvvəl yalnız “Pfizer”, “Moderna”, “Johnson & Johnson” və “AstraZeneca” şirkətlərinin preparatları ilə tam peyvənd olunmuş xarici ölkə vətəndaşları gələ bilərlər. Bundan başqa, turistlər Kanadaya getməmişdən əvvəl maksimum 72 saat əvvəl edilmiş mənfi koronavirus testi nəticəsini təqdim etməli, həmçinin səyahətçilər üçün nəzərdə tutulmuş xüsusi mobil əlavədən qeydiyyatdan keçməlidirlər.
Tam peyvənd olunmuş əcnəbilər 14 günlük karantində qalmayacaqlar, necə ki, bunu Vətənə dönən peyvənd olunmamış kanadalılar etməyə məcbur olur.
DİN-dən bildiriblər ki, 12 yaşadək uşaqlar peyvənd olunmadan Kanadaya səfər edə bilərlər. Lakin onların valideynlərinin və ya qəyyumlarının tam peyvənd olunması mütləqdir. Onlar, həmçinin iki həftəlik karantində qalmayacaqlar, lakin bu uşaqlara ilk 14 gün ərzində Kanadada təhsil müəssisələri və insanların sıx toplaşdığı məkanlara getmək qadağandır.
Bu tədbirlər hələ Hindistan və Mərakeşdən gələn sərnişinlərə aid deyil. Pandemiya fonunda bu ölkələrlə birbaşa hava əlaqəsi sentyabrın sonunadək bağlanıb. Eyni zamanda, bu dövlətlərin vətəndaşları üçüncü ölkələr vasitəsilə yuxarıda göstərilən preparatlarla tam vaksinasiya haqda sertifikatı təqdim etməklə, həmçinin Hindistan və ya Mərakeşdə edilməyən PCR test nəticəsilə səfər edə biləcəklər.

Tehsil-press.az