Universitet təhsil haqqını ödəyə bilməyən tələbələrin siyahısını yayır?

Universitet təhsil haqqını ödəyə bilməyən tələbələrin siyahısını yayır? Azərbaycan Dövlət Mədəniyyət və İncəsənət Universitetində təhsil haqqı borcu olan tələbələrin adlarının açıq şəkildə nümayiş etdirildiyi barədə məlumat yayılıb.
Sözügedən siyahı sosial şəbəkələrdə müzakirələrə səbəb olub. Təhsil borcları olan şəxslərin adının açıq şəkildə nümayişi şəxsiyyətin alçaldılması kimi qiymətləndirilir. Fotosu paylaşılan kağız vərəqdə tələbələrin adları ixtisasları üzrə qeyd edilib.
Məsələ ilə bağlı adıçəkilən universitet açıqlama yayıb. Məlumatda deyilib ki, görüntüləri yayımlanmış siyahı universitetdə nümayiş etdirilməyib: "ADMİU-da bakalavr təhsil pilləsində bütün ödənişli ixtisaslar üzrə illik təhsil haqqı 1800 manatdır. Universitetə ödənişli əsaslarla qəbul olan tələbələrlə bağlanmış fərdi müqavilənin “Ödəniş qaydaları” bölməsinə əsasən, onlar ödəmənin qaydaları ilə tanış olur və müvafiq imza ilə şərtləri qəbul etdiklərini təsdiqləyirlər. Bununla belə, ADMİU rəhbərliyi təhsil haqqına görə dəfələrlə xəbərdarlıq edilməsinə baxmayaraq, heç bir tələbəni universitetdən xaric etmir. Sözügedən siyahıya nəzər saldıqda görmək olar ki, həmin siyahıda 3600 AZN, 3500 AZN, 3352 AZN kimi böyük məbləğlər var. Bu da təhsilinin III və ya IV ilində olan tələbənin 2 (iki) təhsil ilinin haqqını ödəmədiyi halda, kursdan kursa keçirilməsində universitet rəhbərliyi tərəfindən bir problem yaradılmadığının sübutudur. Bu şəxslərin arasında xüsusi imtiyazlı tələbələr yoxdur.
Sosial şəbəkələrdə ADMİU ilə bağlı yazılmış iddialar əsassızdır. Bildiririk ki, görüntüləri yayımlanmış siyahı universitetdə nümayiş etdirilməyib. Universitet rəhbərliyinin təhsil haqqını ödəməyən tələbələrin siyahısının nümayişiylə bağlı heç bir tələbi olmayıb. Bu siyahı semestr imtahanları öncəsi sadəcə bir fakültənin dekanlıq daxilində tyütorlar və mühasibatlıq üçün məlumat xarakterli hazırlanmış siyahısıdır. Daxili sənədin şəklinin çəkilərək yayılması təəssüf doğurur".
Qeyd edək ki, müzakirələrə səbəb olan fotonu Azərbaycan Universitetləri səhifəsi paylaşıb.

Tehsil-press.az



Oxşar xəbərlər