Bakı Dövlət Universitetində (BDU) ümummilli lider Heydər Əliyevin anadan olmasının 99-cu ildönümünə həsr olunmuş “Dahi şəxsiyyət və müdrik lider” mövzusunda respublika elmi konfransı keçirilib.Əvvəlcə universitet kollektivi Fəxri xiyabanda Ulu öndər Heydər Əliyevin məzarını ziyarət edib, məzarı önünə əklil qoyub, gül dəstələri düzüb.
Daha sonra konfrans iştirakçıları BDU-da Ulu Öndərin büstü önünə gül dəstələri qoyublar.
Konfransın plenar iclasını giriş sözü ilə açan universitetin rektoru Elçin Babayev bildirib ki, xalqımızın Ümummilli lideri Heydər Əliyev bütün mənalı ömrünü doğma xalqının xoşbəxt gələcəyinə, ölkəsinin tərəqqisi, dövlətinin möhkəmlənməsi və rifahına həsr edib. Müstəqil Azərbaycan dövlətinin memarı və qurucusu Heydər Əliyevin respublikamıza rəhbərlik etdiyi bütün dövrlər möhtəşəm quruculuq və tərəqqi, davamlı və hərtərəfli inkişaf mərhələləri kimi şanlı tariximizin qızıl səhifələridir: “Həm sovet dönəmində, həm də dövlət müstəqilliyimizin ilk illərində dahi şəxsiyyətin ölkəmizə rəhbərlik etdiyi dövrlər xalqımızın müqəddəratının tənəzzüldən tərəqqiyə doğru dəyişdiyi dövrlərdir. Məhz bu dövrlərdə Ulu Öndərimizin dövlətçilik fəlsəfəsinin əsasını təşkil edən azərbaycançılıq məfkurəsi formalaşıb. Ulu Öndərin respublikaya böyük uzaqgörənliklə və müdrikcəsinə rəhbərlik etdiyi 1969-1982-ci illər Azərbaycanda quruculuq salnaməsinin parlaq dövrü kimi tarixə düşüb. Heç kəsə sirr deyil ki, XX əsrin sonlarına yaxın dövlət müstəqilliyini bərpa etmiş Azərbaycan xalqı üzləşdiyi çətinlikləri, başına gətirilən bəlaları dahi şəxsiyyət Heydər Əliyevin rəhbərliyi ilə dəf etdi. 1990-cı ilin 20 Yanvar faciəsindən sonra o, ilk şəxs idi ki, sovet rəhbərliyinin addımını pislədi. Qanlı Yanvar faciəsini törədənləri ittiham etdi, Kommunist Partiyasının sıralarını tərk etdi”.
Rektor qeyd edib ki, ümummilli liderimiz Heydər Əliyevin ikinci dəfə, ölkəmiz üçün həlledici bir məqamda hakimiyyətə gəlişi Azərbaycanın müasir tarixinin şərəfli səhifələrinin yazılmasına və dövlətimizin müstəqilliyinin əbədiliyinə hərtərəfli zəmin yaratdı. Heydər Əliyevin siyasi müdrikliyi, iradəsi və qətiyyəti, mükəmməl idarəçilik qabiliyyəti sayəsində dövlət müstəqilliyini bərpa etmiş Azərbaycan keçid dövrünün çətinliklərini uğurla arxada qoyaraq dirçəliş mərhələsinə daxil oldu. Balanslaşdırılmış və milli mənafeyə əsaslanan dövlət siyasəti, ictimai-siyasi sabitliyin dayanıqlılığı, iqtisadi qüdrət və güclü sənaye potensialı, elmi-texniki tərəqqi, təhsil və səhiyyənin inkişafı, müasir ordu quruculuğu, xalqın rifahının və həyat tərzinin durmadan yaxşılaşdırılması, milli irsin qorunması və milli-mənəvi dəyərlərin möhkəmləndirilməsi Ümummilli Liderin başlıca strateji hədəflərinə çevrildi: “2003-cü ildən bəri müstəqil dövlətimizin qurucusu və xalqımızın xilaskarı, dahi şəxsiyyət Heydər Əliyev cismən yanımızda olmasa da, onun ideyaları və böyük dühası əbədiyaşardır. Ulu Öndərimizin layiqli davamçısı Prezident İlham Əliyev həm ata vəsiyyətini yerinə yetirən övlad, həm də onun memarı olduğu dövlətin rəhbəri, qurduğu qüdrətli ordunun Müzəffər Ali Baş Komandanı kimi Heydər Əliyev ucalığının parlaq təcəssümüdür. Vətəni, xalqı qarşısında misilsiz xidmətlərinə görədir ki, bu gün ümummilli lider Heydər Əliyev ölkəmizin hər yerində və onun hüdudlarından kənarda belə hər bir azərbaycanlı tərəfindən yüksək ehtiram və dərin minnətdarlıq hissi ilə yad olunur. Ulu Öndərin başladığı quruculuq işlərinin uğurlu icrasını Prezident İlham Əliyev uğurla təmin edir. 44 gün davam edən Vətən müharibəsində, haqq savaşımızda Müzəffər Ali Baş Komandan İlham Əliyevin rəhbərliyi ilə Azərbaycan Ordusu Ermənistanın 30 il ərzində qurduğu silahlı qüvvələrini darmadağın etdi. Ölkəmizin ərazi bütövlüyü təmin edildi. Müzəffər Ali Baş Komandanımızın ətrafında xalqımız yumruq kimi birləşdi, haqq qələbə çaldı”.
Elçin Babayev bildirib ki, “Təhsil millətin gələcəyidir”, - deyən Ümummilli Lider BDU-nun məzunu olmağı ilə fəxr etdiyini dəfələrlə vurğulayıb. Ulu Öndərin universitetdə təhsil illəri, habelə sonralar bu təhsil ocağı ilə sıx əlaqələri BDU tarixinin şanlı bir mərhələsini təşkil edir: “BDU-nun ən böyük məzunu Heydər Əliyevdir. Ona görə ki, bu universiteti, eləcə də bütünlükdə Azərbaycan xalqını Heydər Əliyev qədər yüksəkliklərə qaldıran ikinci məzun yoxdur”.
Milli Məclisin Müdafiə, təhlükəsizlik və korrupsiya ilə mübarizə komitəsinin sədri, BDU-nun Konstitusiya hüququ kafedrasının müdiri Ziyafət Əsgərov Ümummilli Liderin hüquqi dövlət quruculuğu istiqamətindəki fəaliyyəti barədə çıxış edib. Bildirib ki, müstəqil Azərbaycan dövlətinin hüquqi əsaslarının yaradılması Ulu Öndərin adı ilə bağlıdır. Bu əsaslar güclü iqtisadiyyat, ordu quruculuğu və peşəkar xarici siyasətə söykənir. Məhz bu istiqamətlərdə həyata keçirilən uzaqgörən siyasət Azərbaycanın sonrakı uğurlarının və Vətən müharibəsindəki qələbəmizin əsasını qoyub. Hazırda Azərbaycanın güclü iqtisadiyyatı və ordusu var, bütün dünyada artıq ölkəmizlə hesablaşırlar.
Yasamal Rayon İcra Hakimiyyətinin başçısı Elşad Həsənov isə çıxışında Ulu Öndərin müstəqilliyimizin qorunub saxlanılmasındakı xilaskarlıq missiyasını nəzərə çatdırıb. O vurğulayıb ki, Ulu Öndər olmasaydı, Azərbaycan XX əsrin sonlarında ikinci dəfə dövlət müstəqilliyini itirmək təhlükəsi ilə üz-üzə qalacaqdı. O, nəinki xalqın xilaskarı, eləcə də Azərbaycan dövlətinin möhkəmlənməsinin banisidir.
Milli Məclisin deputatı, BDU-nun Genetika kafedrasının müdiri Kamilə Əliyeva çıxışında qeyd edib ki, dahi liderin həyatı və fəaliyyəti hər bir azərbaycanlı üçün nümunədir. Azərbaycanın əldə etdiyi və Prezident İlham Əliyev tərəfindən uğurla davam etdirilən nailiyyətlərin təməlində Ümummilli Liderin müəyyənləşdirdiyi daxili və xarici siyasət kursu dayanır.
Daha sonra Milli Məclisin deputatları, BDU-nun Ümumi dilçilik kafedrasının müdiri Nizami Cəfərov “Heydər Əliyevin dil və ədəbiyyat siyasəti”, Tarix fakültəsinin dekanı İbrahim Zeynalov “Heydər Əliyev: 1969-1982-ci illər intibah dövrünün banisi” mövzularında məruzə ilə çıxış ediblər.
Tədbir ədəbi-bədii hissə ilə davam edib.
Tehsil-press.az
