Xəzər Universitetinin Tarix və arxeologiya departamentinin müəllimləri, tarix üzrə fəlsəfə doktoru Yaqub Məmmədov və doktorant Orxan Zamanov Damcılı mağarasında aparılan Azərbaycan-Yaponiya birgə arxeoloji tədqiqatlarında iştirak ediblər. Azərbaycan tərəfdən qazıntıların rəhbəri Yaqub Məmmədov, Yaponiya tərəfdən isə Tokio Universitetinin professoru Yoşihiro Nişiaki olub.
Qazax şəhərindən 20 kilometr şimal-şərqdə yerləşən Avey dağının şərq ətəyində, Daş Salahlı kəndindən 3 kilometr qərbdə, dəniz səviyyəsindən təxminən 650 metr yüksəklikdə yerləşən Damcılı mağarası 1953-cü ildə Sergey Zamyatin və Məmmədəli Hüseynov tərəfindən qeydə alınıb. 1956-1957-ci illərdə aparılan tədqiqatlar zamanı 2 mindən artıq fauna qalığı və 7 mindən artıq daş məlumatları aşkar olunub. 2016-2019-cu illərdə aparılmış tədqiqatlar nəticəsində 4 mindən artıq arxeoloji nümunə üzə çıxarılıb. Tədqiqatların növbəti ildə də davam etdirilməsi nəzərdə tutulur.

Tehsil-press.az