Türkiyənin Ankara şəhərində Bakı Dövlət Universiteti (BDU) və Ankara Universitetinin birgə təşkilatçılığı ilə Ümummilli Lider Heydər Əliyevin 100 illik yubileyinə həsr olunmuş “Bir millət, iki dövlət” adlı beynəlxalq elmi konfransda “Türk dünyası tarixində Heydər Əliyev” adlı panel iclas keçirilib.
Tədbirdə çıxış edən Milli Məclisin deputatları, akademiklər Rafael Hüseynov və Nizami Cəfərov Ulu Öndərin müstəqil Azərbaycanın xilaskarı olduğunu vurğulayıb, ölkəmizin inkişafı istiqamətindəki əvəzsiz xidmətlərindən, tariximizdəki müstəsna rolundan söhbət açıblar.
BDU-nun Jurnalistika fakültəsinin dekanı, Azərbaycan Mətbuat Şurasının sədr müavini Vüqar Əliyev Azərbaycan mətbuatının, Azərbaycan-Türkiyə mediasının qarşılıqlı əlaqələrinin inkişafında Ulu Öndərin mühüm rolundan bəhs edib.
YAP Yasamal rayon təşkilatının sədri Bəxtiyar Nəbiyev Ulu Öndər Heydər Əliyevin Azərbaycan və Türkiyə əlaqələrinin inkişafında xidmətlərindən və Ümummilli Liderin siyasi kursunun layiqli davamçısı Prezident İlham Əliyev və Türkiyə Prezidenti Rəcəb Tayyib Ərdoğanın qardaşlıq münasibətlətinin hər iki ölkənin inkişafındakı önəmindən danışıb. Natiq, eyni zamanda, Milli Məclisin komitə sədri Sadiq Qurbanovun “Zamana sığmayan lider” kitabından bəzi nüansları konfrans iştirakçılarının diqqətinə çatdırıb.
Konfrans BDU-nun Mədəniyyət-Yaradıcılıq Mərkəzinin solisti Rəqsanə Əsədovanın ifası ilə yekunlaşıb.

Tehsil-press.az