“Disclose” mediasının araşdırmaları nəticəsində Fransa Daxili İşlər Nazirliyinin 2015-ci ildən etibarən sifətin tanınması proqramından gizli şəkildə qanunsuz istifadə etdiyi aşkarlanıb.
Araşdırmalarında Daxili İşlər Nazirliyinin daxili sənədlərinə istinad edən “Disclose” 2015-ci ildən başlayaraq ən yüksək məxfilik şəraitində “Briefcam” şirkətinin alqoritmik videonəzarət (VSA) sistemindən istifadə olunduğunu təsdiqləyib. Qeyd edilir ki, süni intellekt sayəsində bu texnologiya kameralar və ya dronlar vasitəsilə çəkilmiş şəkilləri təhlil etməyə və anormal hesab edilən vəziyyətləri aşkarlamağa imkan verir.
“Briefcam”ın polis xidmətlərində populyarlığı onun əsas xüsusiyyətlərindən biri - sifətə görə şəxsiyyəti aşkarlamağa, izləməyə, kateqoriyalaşdırmağa və qruplaşdırmağa imkan verən sifət tanınması ilə izah olunur.
Məqalədə bildirilir ki, 2015-ci ildə Seine-et-Marne departamentinin ictimai təhlükəsizlik idarəsi (DDSP) bu proqram təminatı ilə təcrübə aparmaq üçün seçilib. İki il sonra, 2017-ci ildə proqramın tətbiq dairəsi daha da genişlənib. Ölkənin çox sayda polis xidmətləri bu proqram təminatı ilə təchiz olunub. Həmçinin nazirliklərarası texniki yardım xidməti (SIAT), telefon dinləməsi və müşahidə həyata keçirən ağır cinayətlərə nəzarət üzrə məsul polis bölməsi kimi xidmətlərdə bu sistemdən istifadə edilib.
“Disclose” qeyd edir ki, Fransada sifətin tanınmasına yalnız nadir istisnalarla icazə verilir. Parlamentin 2023-cü il aprel hesabatında vurğulandığı kimi, bu, “ictimai asayişin pozulmasına və ya mülkiyyətə, insanlara və ya dövlətin nüfuzuna hücuma icazə verən” məhkəmə və yaxud inzibati araşdırmaların bir hissəsi ola bilər.

Tehsil-press.az