İslam Əməkdaşlıq Təşkilatının (İƏT) Ciddə şəhərindəki mənzil-qərargahında İslam universitetləri ilə İƏT-in törəmə-ixtisaslaşdırılmış qurumları arasında ilk əlaqələndirmə toplantısı keçirilib.
İƏT beş üzv dövlətdə 5 filial və köməkçi universitet şəbəkəsinə malikdir. Bu qurumlara Banqladeş Xalq Respublikasında yerləşən İslam Texnologiya Universiteti, Malayziyada yerləşən Beynəlxalq İslam Universiteti, Uqanda Respublikasında yerləşən İslam Universiteti, Niger Respublikasında yerləşən Niger İslam Universiteti və Səudiyyə Ərəbistanındakı Kral Faysal Universiteti daxildir. Bu universitetlər İƏT-in ali təhsil sahəsindəki səylərinin qabaqcıl qüvvəsi hesab olunur.
İclasda çıxış edən İƏT-in Baş katibi Hissein Brahim Taha universitetlərin cəmiyyətlərin gələcəyinin formalaşmasında mühüm rolunu vurğulayıb. Onun sözlərinə görə, bu akademik qurumlar təhsilə və elmi tədqiqatlara töhfələri ilə icmaların inkişafında vacib rola malikdirlər. Baş katib vurğulayıb ki, universitetlərin cəmiyyətlərin gələcəyi olan gənclərin formalaşmasına təsiri çox böyükdür. O, İƏT adından İslam universitetlərinə davamlı dəstəyini ifadə edib.
Baş katib İslam dünyasının hazırkı vəziyyətini təhlil edərək, müstəsna ideyaları həyata keçirmək və müsəlman gənclər üçün yeni imkanlar yaratmaq məqsədilə səmərəli əməkdaşlıq potensialını diqqətə çatdırıb. O, İƏT ölkələrinin üzləşdiyi çətinliklərin öhdəsindən gəlmək üçün təhsil sektorunun üzləşdiyi aktual problemləri etiraf edib, onların həllinin intensiv əməkdaşlıq və ümumi baxış tələb etdiyini bildirib. H.B.Taha qeyd edib ki, yoxsulluq, iqlim dəyişikliyi, sürətli texnoloji irəliləyişlərlə ayaqlaşmaq, əmək bazarı şərtlərinə uyğunlaşmaq və təhsilə, xüsusən də qızların təhsilinə üstünlük vermək ən aktual problemlərdir. Baş katib İƏT ölkələri daxilində böyümə və inkişafı dəstəkləmək üçün bu problemlərin həllinin və təhsilin prioritetləşdirilməsinin vacibliyini vurğulayıb.
Baş katib bu çağırışların öhdəsindən gəlmək üçün İƏT-in təsisatları, xüsusən də universitetlər arasında əməkdaşlığın və sinerjinin gücləndirilməsinin vacibliyini qeyd edib.
İlk koordinasiya görüşü akademik və inzibati sektorlarda dialoq, fikir və təcrübə mübadiləsi üçün mühüm platforma olması baxımından böyük əhəmiyyət kəsb edir. Bundan əlavə, bu tədbir universitetlərin əlaqələrinin genişləndirilməsi üzrə gələcək koordinasiya və əməkdaşlıq üçün dəyərli fürsət təqdim edir.

Tehsil-press.az