Gürcüstan Azərbaycanla Ermənistan arasında sülh müqaviləsinin imzalanmasında maraqlıdır.

Bunu Gürcüstanın Ermənistandakı səfiri Georgi Şarvaşidze deyib.

“Gürcüstan regionda sülhün və sabitliyin dəstəklənməsində səmimi maraqlıdır. İnanırıq ki, dinc yanaşı yaşama, dialoq və konstruktiv əməkdaşlıq hamının mənafeyinə uyğundur. Gürcüstan tərəfi bir daha bu prosesə qonşularımızın ehtiyacı və tələb etdiyi qədər töhfə verməyə və dəstəkləməyə hazır olduğunu bildirir. Ümid edirik ki, yaxın vaxtlarda Ermənistan və Azərbaycan arasında sülh müqaviləsi imzalanacaq”, - diplomat bildirib.

Şarvaşidze ölkəsinin Cənubi Qafqazdan keçən Orta dəhlizlə bağlı mövqeyinə də diqqət çəkib:

“Mövcud qlobal hadisələri nəzərə alsaq, Cənubi Qafqaz bütün Avropa qitəsi üçün tamamilə yeni imkanlar təklif edir. Şərqlə Qərbi birləşdirən regionun strateji yeri, eləcə də enerji resursları davamlı əlaqəni təmin etmək üçün vacibdir. Enerji və infrastruktur sahələrində mövcud olan, eləcə də yeni regional təşəbbüslər regionumuzun imkanlarını əhəmiyyətli dərəcədə artıracaq.

Gürcüstan Orta dəhlizin mühüm hissəsi olan əlaqəni əsas prioritet hesab edir. Orta dəhliz iqtisadi təşəbbüs olmaqla yanaşı, daha böyük regional inteqrasiya və sabitliyə nail olmaq üçün bir vasitədir. Bunu nəzərə alaraq, regionumuzun inteqrasiyasını dərinləşdirməyə yönəlmiş bir sıra enerji və infrastruktur layihələrinin icrasına başlamışıq”.

Səfir bu məqsədlə Qara dəniz sahilində Anakliya dərin dəniz limanının tikintisinə başlanıldığını söyləyib:

“Sülhə dəstək baxımından Gürcüstan Cənubi Qafqaz ölkələri arasında regional əməkdaşlığın asanlaşdırılmasında maraqlıdır. Gürcüstan dialoq, etimadın möhkəmləndirilməsi və ümumi maraq kəsb edən konkret layihələrin həyata keçirilməsi yolu ilə regional münasibətlərin tənzimlənməsinə töhfə verə biləcək əməkdaşlıq formatını təklif edib. Ümumiyyətlə, biz regionda davamlı iqtisadi inkişaf, sülh və sabitliyin təmin edilməsinə yönəlmiş regional təşəbbüsləri nəzərdən keçiririk”.\\Teleqraf.com

Tehsil-press.az