Çin Xalq Respublikasının Sian şəhərində Avrasiya Beynəlxalq Elmlər Akademiyasının Çin Elmi Mərkəzi tərəfindən təşkil edilən “Bir xətt və bir yol” adlı Elmi-Texniki və İnnovativ Əməkdaşlıq Forumu keçirilib. Forumda Bakı Dövlət Universitetini prorektor, professor İradə Əliyeva və Bioekologiya kafedrasının müdiri, professor Nərminə Sadıqova təmsil ediblər.
Professor İradə Əliyeva Bakı Dövlət Universitetinin Avrasiya qitəsində rolu, kimya, fizika, biologiya və nanotexnologiyalar sahəsində universitet alimlərinin, tələbələrinin və doktorantların nailiyyətləri haqqında məruzə ilə çıxış edib.
Forum çərçivəsində BDU nümayəndə heyəti həmçinin Pekində keçirilən Beynəlxalq Elmi-Texniki konfransa və Çində İpək Yolu Beynəlxalq Elmlər Akademiyasının yaradılması ilə bağlı konqresə də qatılıb. Qeyd edək ki, Çin, Rusiya və Qazaxıstanın təşəbbüslərini dəstəkləyən 25 ölkə İpək Yolu Beynəlxalq Elmlər Akademiyasının yaradılması haqqında protokol imzalayıblar.
Keçirilən görüşlərdə çıxış edən prorektor İradə Əliyeva Azərbaycanın dünya sisteminə uğurlu inteqrasiyasından, o cümlədən BDU-nun dünyanın aparıcı universitetləri və elmi-tədqiqat mərkəzləri ilə məhsuldar əlaqələrindən bəhs edib, Akademiyanın təşkilati məsələləri və Nizamnaməsi haqqında keçirilən müzakirələrdə fəal iştirak edib.
Tədbirin sponsorları - Çin elmi-texniki və İnnovativ İnstitutu və Çin Elmi-Texniki Mübadilə Beynəlxalq Mərkəzinin təmsilçilərinin çıxışlarından sonra forum təsdiq edilmiş sənədlərin təntənəli imzalanma mərasimi ilə yekunlaşıb.

Mətbuat və informasiya şöbəsi