BSU-nun rektoru MAPRYALın Rəyasət heyətinin üzvü seçilib

BSU-nun rektoru MAPRYALın Rəyasət heyətinin üzvü seçilib Məlum olduğu kimi, bu il 29 aprel – 3 may tarixlərində Kazaxstan Respublikasının paytaxtı Nur-Sultan şəhərində Rus Dili və Ədəbiyyatı Müəllimləri Beynəlxalq Assosiyasiyasının (MAPRYALın) XIV Konqresi və Baş Assambleyası keçirilib. Konqresdə Bakı Slavyan Universitetini tədris işləri üzrə prorektor professor Telman Cəfərov, elmi işlər üzrə prorektor professor Rafiq Novruzov, Ədəbiyyat nəzəriyyəsi və dünya ədəbiyyatı kafedrasının professoru Rəhilə Quliyeva təmsil ediblər.
49 ölkənin təmsil olunduğu mötəbər tədbirin açılışında Qazaxstan Respublikası və Rusiya Federasiyasının rəsmiləri iştirak etmiş, hər iki ölkənin dövlət və hökümət başçılarının təbrik məktubları oxunub.
“Çoxdilli dünyada rus sözü” adı altında keçirilən XIV Konqres 14 elmi-metodiki istiqamət (bölmə) və 6 dairəvi masada 500-dən çox məruzə, çıxış və təqdimatı əhatə edib. Rus dili və ədəbiyyatının tədqiqi, tədrisi, dünyada rus dilli təhsilin vəziyyəti və perspektivləri, problemləri, internet resurslar, distant təhsil kimi ənənəvi elmi-nəzəri və elmi-praktiki istiqamətlərlə yanaşı, müasir çoxdillilik və çoxmədəniyyətlilik şəraitində bilinqval və polilinqval təhsil modellərinin tətbiqi təcrübəsi, sosial-pedaqoji-psixoloji və linqvodidaktik əsasları, milli zəmində gənc nəslə multikultural dəyərlərin aşılanması və s. kulturoloji məsələlər müzakirə olunub.
Mayın 2-də BSU nümayəndələri prof. T.Cəfərov və prof.R.Novruzov MAPRYALın prezidenti akad. L.A.Verbitskayanın hesabatının dinlənildiyi, yeni prezidentin, vitse-prezidentlərin, növbəti – XV Konqresə ev sahibliyi edəcək şəhərin, Rəyasət heyəti üzvlərini müəyyən edildiyi Baş Assambleyada həlledici səslə iştirak ediblər. Rusiya prezidentinin rus dilinin inkişafı üzrə məsləhətçisi, L. N. Tolstoyun nəticəsi P.İ.Tolstoy MAPRYALın yeni prezidenti seçilib.
Assosiyasiya prezidentini hesabat məruzəsində və BSU nümayəndələrinin çıxışlarında Azərbaycanda keçirilən tədbirlər, xüsusilə də Bakı Slavyan Univer-siteti və MAPRYALın təşkil etdiyi birgə elmi konfrans, seminarlar, ixtisasartırma tədbirləri yüksək qiymətləndirilib.
Son üç ildə davamlı olaraq respublikada rus dilinin tədrisinə, rusdilli təhsilə, Rusiya–Azərbaycan əlaqələrinin inkişafına və qorunmasına verdiyi töhfələr nəzərə alaınraq BSU rektoru professor Nurlana əliyeva MAPRYAL prezidenti, milli assosiyasiyaların rəhbərləri, tanınmış elm və təhsil xadimləri tərəfindən MAPRYAL Rəyasət heyətinə üzvlüyə namizəd irəli sürmüş və səs çoxluğu ilə qəbul edilmişdir. Gizli səsvermə nəticəsində XV konqresin Sankt-Peterburqda keçirilməsi qərara alınıb.

BSU-nun Mətbuat Xidməti


BSU-nun rektoru MAPRYALın Rəyasət heyətinin üzvü seçilibBSU-nun rektoru MAPRYALın Rəyasət heyətinin üzvü seçilib


Oxşar xəbərlər