Bolqarıstandakı Rusiya səfiri Eleonora Mitrofanovaya casus qalmaqalı ilə əlaqədar iki rus diplomatın ölkədən çıxarılmasını tələb edən nota göndərilib.
Söhbət “NATO - gizli” etiketli sənədlər alan Rusiya xarici kəşfiyyat xidmətinin işçiləri Aleksandr Zinkin və Maksim Rıbkindən gedir.
Bolqarıstan televiziyasının verdiyi məlumata görə, onların həyat yoldaşları Yelena Zinkina və Yevgeniya Safronovanın cinayət işində adı “sakin” olaraq gedən İvan İliyevin həyat yoldaşı ilə tez-tez görüşmələri barədə məlumatlar ortaya çıxıb.
Kanal iddia edir ki, istintaq çərçivəsində iki Rusiya vətəndaşının Bolqarıstanda diplomatik münasibətlərə uyğun olmayan tənzimlənməmiş kəşfiyyat fəaliyyəti apardığı müəyyənləşdirilib.
Rusiyanın Sofiyadakı səfirliyinin məlumatına görə, bu arada, Rusiya tərəfi iki rus diplomatın Bolqarıstandan çıxarılması qərarını əsassız sayır və cavab tədbiri görmə hüququnu özündə saxlayır.
“Bu il 22 martda Bolqarıstan Xarici İşlər Nazirliyi Rusiyanın Sofiyadakı səfirliyinin iki diplomatını “persona non grata” elan edib. Təəssüf hissi ilə bildirməliyik ki, bu, Bolqarıstan hakimiyyət orqanlarının növbəti əsassız demarşı konstruktiv Rusiya-Bolqarıstan dialoqunun qurulmasına töhfə verməyəcəkdir”- deyə diplomatik nümayəndəliyin feysbuk hesabında bildirilib.
Xatırladaq ki, 19 martda Bolqarıstan prokurorluğu ölkənin bir neçə hərbi kəşfiyyat zabitinin Sofiyada keçirilmiş xüsusi əməliyyat çərçivəsində Rusiyaya casusluq şübhəsiylə saxlanıldığını açıqlamışdı.

Tehsil-press.az