Yanvarın 19-da UNEC-də 20 Yanvar hadisələrinin 27 illiyinə həsr edilən tədbir keçirilib.
UNEC-in şəhid məzun və tələbələrinin xatirəsinə ucaldılan Memorial Abidənin önündə təşkil edilən tədbirdə universitetin professor-müəllim heyəti ilə birlikdə şəhid ailələri də iştirak edib.
UNEC rektoru, professor Ədalət Muradov, universitet kollektivi və şəhid ailələri “Qanlı yanvar UNEC tələbələrinin gözü ilə” adlı rəsm və foto sərgiyə baxış keçiriblər. Tədbir iştirakçıları Memorial Abidənin önünə gül dəstələri düzərək, şəhidlərin əziz xatirəsini bir dəqiqəlik sükutla yad ediblər.
UNEC rektoru, professor Ədalət Muradov 20 Yanvar faciəsinin başvermə səbəblərindən söz açaraq, 27 il əvvəl törədilən qətliamın insanlığa qarşı qatı cinayət olduğunu, yaddaşlara Qara Yanvar gecəsi kimi həkk olunan bu tarixin həm şəhidlərin anım günü, həm də Azərbaycanın ərazi bütövlüyü uğrunda mübarizə aparan xalqımızın birlik, fəxr və şərəf günü sayıldığını vurğulayıb. “Şəhid tələbələr hər zaman bizim qürur mənbəyimiz olub” deyən rektor, UNEC-də onların adının daim hörmət və ehtiramla xatırlandığını bildirib.
Rektor 20 Yanvar hadisələrinə siyasi-hüquqi qiymət verilməsi barədə də danışıb. Qeyd edib ki, bu hadisələrə dövlət səviyyəsində lazımi siyasi-hüquqi qiymət yalnız Ümummilli lider Heydər Əliyevin hakimiyyətə gəlişindən sonra verildi. Ulu öndər həyatını təhlükə qarşısında qoyaraq, Azərbaycanın Moskvadakı daimi nümayəndəliyinə gələrək qanlı faciənin təşkilatçılarını dünya ictimaiyyəti qarşısında qəzəblə qınadı, ifşaedici və cəsarətli bəyanat verdi. Daha sonra Ümummilli liderin təşəbbüsü ilə Naxçıvan Muxtar Respublikasının Ali Məclisi 20 Yanvar faciəsinə ilk siyasi qiymət verdi.
UNEC-in şəhid tələbəsi Habil Əzizovun qardaşı Etimad Əzizov qardaşı ilə bağlı xatirələrini bölüşüb: “Qardaşım Habilin öz doğum günündə şəhidlik zirvəsinə ucalıb. Bu universitetin tələbəsi olmağı uşaqlıqdan arzu edirdi. Tale belə gətirdi ki, o məzun ola bilmədi və İqtisad Universitetinin əbədi tələbəsi adını qazandı”. Tədbirə qatılan digər şəhid yaxınları – İlqar Əbilhəsənovun qardaşı Yavər Əbilhəsənov və Məhəmməd Umudovun atası Eldar Umudov şəhid ailələrinə olan dövlət dəstəyindən söz açıblar.
20 yanvar şəhidi Aslan Ağaverdiyevin nəvəsi, UNEC-in tələbəsi Aslan Əzimzadə adını daşıdığı babasının şəhidlik zirvəsinə ucalmasından söz açıb. “Şəhid ailəsində göz açdığımdan əminliklə deyə bilərəm ki, dövlətimizin diqqətini hər zaman hiss etmişəm” deyən A.Əzimzadə UNEC tələbələrinin şəhidlərin qəhrəmanlıq yolunu davam etdirməyə hazır olduqlarını bildirib.
UNEC haqqında:
UNEC Azərbaycan Dövlət İqtisad Universitetinin brendidir. 21 yanvar 2016-cı ildə Standartlaşdırma, Metrologiya və Patent üzrə Dövlət Komitəsi tərəfindən UNEC brendi qeydiyyata alınaraq, patentləşdirilib.

UNEC-in Mətbuat Xidməti