Azərbaycan Milli Elmlər Akademiyasının (AMEA) Rəyasət Heyətinin növbəti iclası keçirilib.İclası AMEA-nın prezidenti, akademik Ramiz Mehdiyev açaraq gündəlikdəki məsələləri təqdim edib, iclasda bir sıra elmi-təşkilati məsələlərə dair müzakirələrin aparılacağını diqqətə çatdırıb.
AMEA-nın akademik-katibi, müxbir üzvü Əminağa Sadıqov Rəyasət Heyəti aparatının strukturu və idarəetmə sisteminin, habelə kadrların seçilməsi və yerləşdirilməsi işinin təkmilləşdirilməsi məqsədilə AMEA prezidentinin 2019-cu il 21 noyabr tarixli sərəncamı ilə Komissiyanın yaradıldığını və hazırlanmış təkliflərin akademik Ramiz Mehdiyevə təqdim edildiyini söyləyib. Əminağa Sadıqov Strateji Elmi Tədqiqatlar Mərkəzinin fəaliyyətinə dair Rəyasət Heyətinin qəbul etdiyi qərarları iclas iştirakçılarının diqqətinə çatdırıb.
AMEA-nın akademik-katibi Nizami Gəncəvi adına Ədəbiyyat İnstitutunun strukturunda qismən dəyişiklik edilməsi haqqında məlumat verib. Bildirib ki, Azərbaycan ədəbiyyatının inkişaf yolunun elmi-nəzəri cəhətdən yenidən və əsaslı şəkildə dövrləşdirilməsi Ədəbiyyat İnstitutunun Qədim dövr Azərbaycan ədəbiyyatı şöbəsinin fəaliyyət istiqamətinə də öz təsirini göstərib və şöbənin adında dəyişiklik edilməsi zərurətini meydana çıxarıb.
Sonra iclasda AMEA-nın Folklor və Şərqşünaslıq institutlarının strukturlarında qismən dəyişiklik edilməsi məsələləri müzakirə edilib, bu qurumlarda yeni şöbələrin yaradılması ilə bağlı müvafiq qərarlar qəbul edilib.
Daha sonra AMEA-nın müxbir üzvləri Məsumə Məlikovanın 90, Hacıfəxrəddin Səfərlinin 70, eləcə də Əlişir Musayevin 70 illik yubileyləri ilə əlaqədar alimlərin AMEA-nın fəxri fərmanları ilə təltif edilmələrinə dair qərarlar qəbul edilib.
İclasda, həmçinin “AMEA-nın professoru” adı ilə bağlı məsələyə yenidən baxılaraq müvafiq qərar qəbul olunub.
Bundan başqa, tədbirdə AMEA-nın Yüksək Texnologiyalar Parkı MMC-nin strukturu və ştat cədvəli ilə bağlı müzakirələr aparılıb.
Tehsil-press.az
