Bakı Ali Neft Məktəbi (BANM) Rusiyanın Nijnevartovsk şəhərində keçirilmiş Fərman Salmanov adına II Beynəlxalq Akademik Neft Konqresində təmsil olunub.Konqresin plenar iclasında Bakı Ali Neft Məktəbinin Beynəlxalq əlaqələr şöbəsinin əməkdaşı İradə Əhmədova beynəlxalq əməkdaşlıq, akademik əlaqələr, tədqiqat və innovasiyaların təşviqi, yüksəkixtisaslı gənc mühəndislərin yetişdirilməsi istiqamətində bu ali məktəbin təcrübəsini bölüşüb. O vurğulayıb ki, BANM təhsilə ən istedadlı tələbələri cəlb edir. Ali məktəb xüsusi texniki biliklərin verilməsi, akademik göstəricilərin təcrübəyə uyğunlaşdırılması, eləcə də emosional zəkanın inkişaf etdirilməsi və bununla da məzunlarının hamısının işlə təmin olunması üçün müxtəlif təhsil imkanları təklif edir.
Bakı Ali Neft Məktəbi qabaqcıl beynəlxalq universitetlərin təklif etdiyi müxtəlif mübadilə və ikili proqramlardan yararlanmaqla yanaşı, beynəlxalq tələbələrin qəbulu zamanı tətbiq etdiyi təcrübə konqres iştirakçılarında xüsusi maraq doğurub.
Məlumat verilib ki, bu il Yuqra Dövlət Universiteti ilə mübadilə proqramı çərçivəsində ilk tələbə qrupu Bakı Ali Neft Məktəbində təhsil almağa başlayıb. Yaxın gələcəkdə tələbə sayının artırılması, xüsusilə daha çox qız tələbələrin cəlb olunması gələcək ikitərəfli əməkdaşlığın prioritetidir.
Qeyd edək ki, Qərbi Sibirdə 130-dan çox nəhəng neft-qaz yatağını kəşf etmiş Azərbaycanın görkəmli geoloqu Fərman Salmanovun şərəfinə adlandırılmış Surqutdakı beynəlxalq hava limanı ilə yanaşı, onun adını daşıyan Beynəlxalq Akademik Neft Konqresi hər il Rusiyanın Xanti-Mansi Muxtar Dairəsində keçirilir.
Konqres Yuqra Dövlət Universitetinin təşəbbüsü ilə “Neft paytaxtı” Beynəlxalq Gənclərin Tədqiqat Forumu çərçivəsində təşkil edilir.
Forumda enerji sektoru və tədqiqat infrastrukturunun inkişafı problemləri və perspektivləri, dayanıqlı resurs idarəçiliyinin inkişafı və yüksəkixtisaslı mütəxəssislərin yetişdirilməsi kimi mövzular müzakirə edilir. Beynəlxalq Akademik Neft Konqresinin əsas məqsədi isə ilk növbədə universitetlər, elm sahəsi və neft-qaz sənayesi arasında sinerji yaratmaqdır.
Tehsil-press.az
