Emin Hüseynov: “Arzum budur ki, əsl şəxsiyyət olan vətəndaşlar yetişdirim”
Emin Hüseynov 1990-cı ildə Samux rayonu Qarabağlar kəndində anadan olub. 2011-ci ildə Gəncə Dövlət Universitetinin xarici dillər fakültəsinin ingilis dili müəlimliyi ixtisasını bitirib. 2013-cü ildə Təhsil Nazirliyinin təşkil etdiyi Müəllimlərin işə qəbulu müsabiqəsində iştirak edərək Gədəbəy rayonunun Söyüdlü kənd tam orta məktəbinə ingilis dili müəllimi təyin olunub. 2016-cı ildə müəllimlərin diaqnostik qiymətləndirilməsində 54 bal toplayıb. Həmin il müəllimlərin yerdəyişməsi üzrə müsabiqədə iştirak edərək Şəmkir rayonu Seyfəli kənd tam orta məktəbində pedaqoji fəaliyyətini davam etdirib. 2018-ci ildə yenidən yerdəyişmə prosesindən keçərək Göygöl rayon Nadil kənd tam orta məktəbində çalışmağa başlayıb.
- Müəllimlik peşəsinə sizdə maraq necə yaranıb?
- Şagird olduğum dövr gələcək planları müəyyənləşdirmək, sahib olmaq istədiyim peşə, qazanacağım nailiyyətlər üçün bir başlanğıcdır. Hər bir sahədə stimul vacib məsələlərdən biridir. Mənim də stimul aldığım çox qabaqcıl müəllimlərim var idi. Məktəbdə oxuduğum müddətdə ilk müəllimim - ibtidai sinif müəllimim mənim üçün əsl müəllimlik siması idi. O, bizimlə çox yaxşı davranır, yalnız bir müəllim yox, yaxın bir insan, mehriban bir ailə üzvü kimi münasibət bəsləyir və öz övladları kimi can yandırardı.Yadımdadı. Dərslərin birində mən mövzunu izah etdim, yerimə əyləşəndə müəllimim məni saxladı və dedi: “Səndə çox yüksək müəllimlik bacarığı və savadı var, çalış istifadə et və müəllim ol!”. Bəlkə də həmin gündən müəllimlik fəaliyyətim başladı. Ulu öndər Heydər Əliyev demişdir: “Mən yer üzündə müəllimdən yüksək ad tanımıram”. Bu, böyük qiymətdir.
- Pedaqoji fəaliyyətinizdə qazandığınız nailiyyətlər barədə nə deyə bilərsiniz?
- Pedaqoji fəaliyyətə başladığım andan ən böyük uğuru əldə etdiyimi anladım. Bu, müəllimlik idi. Qəlblərə yol tapmaq, onlarla şagirdin gələcəyini müəyyənləşdirəcək bir şəxs olmaq əvəzolunmaz bir hissdir. Pedaqoji fəaliyyətə ilk başladığım yer Söyüdlü kənd tam orta məktəbi idi. O kəndin qışı çox sərt keçirdi.
Pedaqoji fəaliyyətə başladığım ilk gündən şagirdlərimdə ingilis dilinə maraq artdı. Bir neçə məzun şagirdim universitetə qəbul olundu.
- Dərs verdiyiniz şagirdlərinizin ali məktəblərə qəbul olma nəticəsi sizi qane edirmi?
- Bu gün şagirdlərimin nəticəsi məni qane edir. Müəllim şagirdə təkcə fənnini yox, həyatı öyrətməlidir. Mən şagirdlərimlə fəxr edirəm.
- Dərs prosesində ən çox hansı metodlardan istifadə edirsiniz?
- Mən dərs prosesində hər şagirdə eyni yanaşmağa çalışıram. Ən əsası sinifdə ayrı-seçkilik salmıram. Şagirdlərdə fənnə maraq yaratmaq üçün zəif olan şagirdləri güclü şagirdlər kimi sual-cavab edirəm. Çünki şagirdlər uşaqlıq dövrünü yaşayırlar, onların daim xoş münasibətə və dəstəyə böyük ehtiyacları var.
- Sizcə, əsl müəllim olmaq nə deməkdir?
- Müəllim olmaq, müəllimlik etməkdən daha yüksəkdir. Bir də müəllim olmaq, müəllimlə şagirdin bir-birlərinə xoş baxa bilmələri, müəllimin şagirddə, şagirdin müəllimdə axtardığı ən yaxşı xüsusiyyətləri əldə etməkdir.
Bu da bir həqiqətdir ki, bütün yaş qruplarında olan şagirdlər müəllimlərini güvəniləcək bir insan kimi görür və buna görə də müəllimlərinin yolu ilə irəliləyirlər. Biz müəllimlər də hər zaman özümüzü şagirdlərimizin yerinə qoymalıyıq. Onların bizdən gözlədikləri, istəkləri əsas iş prinsipimiz olmalıdır.
- Dərs prosesində şagirdlərin marağını artırmaq üçün hansı yenilikləri tətbiq edirsiniz?
- Yeni üsulun bir çox üstünlükləri var. Dərs müddətində müxtəlif kurikulum üsullarından istifadə edərək dərsi qururam. Şagirdlərlə rollu oyunlar və ya karusel kimi üsullardan istifadə edirəm. Hər zaman yenilikləri şagirdlərin qəbul edəcəyi formada izah etməyə çalışıram.
- Gələcəklə bağlı planlarınız necədir?
- Arzum budur ki, pedaqoji fəaliyyətimlə əsl şəxsiyyət olan vətəndaşlar yetişdirim. Çünki Azərbaycanımız dahi insanlar yurdudur. Nizamilər, Füzulilər yetişdirmiş bu torpaqda müəllimlər əlindən gələni elə etməli, elə işləməlidirlər ki, onların yetişdirdiyi ağaclar elə məhsul versin ki, bütün dünya bu torpaqdan, bu diyardan danışsın!
Unutmamalıyıq ki, Vətənə dəstək olmaq, onun çiçəklənməsində əlindən gələni etmək hər bir vətəndaş kimi biz müəllimlərin də borcudur!

Raminə MƏMMƏDOVA,
Göygöl Rayon Təhsil Şöbəsinin ictimaiyyətlə əlaqələr üzrə məsul şəxsi