Türkiyədə koronavirusun yayılması səbəbilə məktəblərin bağlanmasından sonra başladılan distant təhsil 31 maya qədər davam edəcək.
Bu barədə Türkiyənin Təhsil naziri Ziya Selçuk açıqlama verib.
“Distant təhsilinin mayın 31-dək davam edəcəyi qərara alındı. Distant təhsil hazırda əlimizdə olan yeganə seçimdir. Bütün övladlarımızdan və valideynlərdən xahişim distant təhsili davam etdirməkdir. 16 Mart 2020-ci il tarixindən etibarən məktəblərin bağlanmasından sonra bir həftədən də qısa müddətdə distant təhsili başlatdıq”, - deyə nazir bildirib.
O qeyd edib ki, əsas diqqət imtahanlara hazırlaşan şagirdlərə yönəlib: “İmtahana hazırlaşan şagirdlər ən həssas mövzumuzdur. 11 və 12-ci siniflərdə oxuyan şagirdlərimiz tərəfindən süni intellektlə dəstəklənən təhsil sisteminə sıx tələb var. Deyə bilərəm ki, EBA akademik dəstək platformasına daxil olan tələbələrin sayı 1 milyona yaxınlaşır”.
Xatırladaq ki, Türkiyədə koronavirusun yayılması səbəbindən martın 16-dan etibarən bütün tədris müəssisələrində təhsil dayandırılıb.

Tehsil-press.az