Azərbaycan Dillər Universitetinin (ADU) nəzdində fəaliyyət göstərən Konfutsi İnstitutunda Bahar bayramının sonu və ilin ilk gecəsinin başlanğıcını bildirən ənənəvi Çin fənərləri bayramı qeyd olunub.
Konfutsi İnstitutunun əməkdaşı Nigar Bədəlbəyli bayramın yaranması ilə bağlı əfsanələr, fənər festivalı ənənələri - Yangge rəqsi, alovlu əjdaha görünüşündə fənərlə rəqs, şirlərin rəqsi, müxtəlif çeşidli içliyi ilə düyü unundan böyük toplar formasında hazırlanan şirin bayram yeməyi “yuanxiao” barədə məlumat verib. O, bayramın əsas mərasimi - müxtəlif heyvanlar, çiçəklər və meyvələrə bənzər və əsl sənət əsərləri olan ənənəvi Çin çıraqlarından danışıb. Tələbələr, həmçinin bayramın ayrılmaz hissəsi sayılan fənərlərə yapışdırılmış tapmacaların cavablarını tapmaqla əyləncəli bir gün keçiriblər.
Konfutsi İnstitutunun direktoru Rafiq Abbasov qeyd edib ki, ənənəvi Çin bayramlarının məzmunu müxtəlif və rəngarəng, qədim tarixə malik unikal Çin mədəni irsinin bir hissəsidir. Çinşünas tələbələrin ənənəvi Çin bayramlarında iştirakı onlara Çin etnosunun sosial-mədəni xüsusiyyətlərini daha yaxşı başa düşməyə imkan verir, Çin mədəniyyətinə maraq yaradır və Çin dilinin öyrənilməsi prosesini tamamlayır.

Tehsil-press.az