Azərbaycan Dillər Universitetinin (ADU) professoru Azad Məmmədov və polşalı professor Barbara Levandovska-Tomaşekin həmredaktorluğu ilə Böyük Britaniyanın “Cambridge Scholars Publishing” nəşriyyatı “Ənənəvi və yeni media diskurs təhlili” adlı məqalələr toplusu nəşr edib.
Topluda Azərbaycan, Gürcüstan, Macarıstan və Şimali Makedoniyadan olan tədqiqatçıların da məqalələrinə yer ayrılıb. Nəşrdə, həmçinin Azərbaycan Dillər Universitetinin müəllimləri - filologiya üzrə fəlsəfə doktorları Aytən Rzayeva, Nigar Mədətova, Ramilə Hüseynova, eləcə də baş müəllim Cəmilə Rəsulovanın məqalələri yer alıb.
Kitabda media diskurs həm linqvistik, həm də media və kommunikasiya tədqiqatları baxımından araşdırılır. Media diskurs son onilliklərdə humanitar və sosial elmlərin bir sıra sahələrinin diqqətini cəlb edib. Bu diskurs tipi və onun janrlarında istifadə olunan dilin spesifik xüsusiyyətləri, eləcə də media fenomeninin cəmiyyətdə rolu media diskurs təhlilini diqqətdə saxlayan amillərdəndir.
Son dövrlərdə yeni medianın sürətli inkişafı media diskurs tədqiqatçılarında da maraq oyadıb. Bu mənada kitab həm ənənəvi media, həm də yeni media diskurslarının indiyə qədər hələ tədqiq olunmamış aspektlərini üzə çıxarmağa kömək edə bilər.

Tehsil-press.az