Türkiyənin İzmir şəhərində Ege Universiteti Türk Dünyası Araşdırmaları İnstitutu, AMEA-nın Folklor İnstitutu (Azərbaycan) və İKSAD İnstitutunun (Türkiyə) təşkilatçılığı ilə 5-ci beynəlxalq “Dədə Qorqud – türk mədəniyyəti, tarixi və ədəbiyyatı” konfransı keçirilib. Konfransın işində Türkiyə, Azərbaycan, İran və Orta Asiya ölkələrindən 200-dək alim iştirak edib. Açılış mərasimində Ege Universitetinin rektor köməkçisi professor Mehmet Ersan, Türk Dünyası Araşdırmaları İnstitutunun şöbəsinin müdiri professor Metin Ekici, Azərbaycan Milli Elmlər Akademiyası Folklor İnstitutunun Dədə Qorqud şöbəsinin müdiri professor Ramazan Qafarlı, İKSAD İnstitutunun prezidenti Mustafa Lətif Emek, Ege Universiteti Elm və Texnologiya İnstitutunun direktoru Bəhri Başaran, Sosial Elmlər İnstitutunun direktoru Mustafa Mutluer, Türk Dünyası Araşdırmaları İnstitutunun direktor müavini Alimcan İnayet çıxış ediblər.Ramazan Qafarlı çıxışında bildirib: “Dədə Qorqud konfranslarının ardıcıllıqla keçirilməsi iki qardaş türk dövlətinin bir yerdə yaşadığını göstərdi. Çünki “Kitabi-Dədə Qorqud” qədim kökə malik ulusları birləşdirmək ideyasını özündə əks etdirir. Biz son illərdə dünyaya bəxş etdiyimiz ortaq dəyərlərimizlə mədəniyyətsevər xalqlar olduğumuzu sübut etmişik”.
Bölmə iclaslarında AMEA Folklor İnstitutunun Mifologiya şöbəsinin müdiri, filologiya elmləri doktoru professor Seyfəddin Rzasoy “Salur Qazan: özünün sol gözü, yaxud Təpəgözlə savaşan qəhrəman” mövzusunda məruzəsində abidəni ritual-mifoloji kontekstdə təhlil edərək Təpəgöz obrazı ilə bağlı yeni konsepsiya təklif edib. Folklor İnstitutunun Mərasim folkloru şöbəsinin əməkdaşı filologiya üzrə fəlsəfə doktoru Qalib Sayılovun “Kitabi-Dədə Qorqud” eposunda İslam kanonları” mövzusunda məruzəsi dinlənilib.
Bakı Dövlət Universitetinin Qafqaz xalqları tarixi kafedrasının müdiri professor İradə Hüseynovanın “Ulu öndər Heydər Əliyev siyasi kursunun layiqli davamçısı İlham Əliyevin Qarabağ münaqişəsinin həll edilməsi uğrunda mübarizəsi”, tibbi biologiya elmləri doktoru professor Yaşar İbadovun “Dədə Qorqud tarixi şəxsiyyətdir” mövzularında məruzələri maraqla qarşılanıb.
Tehsil-press.az
