Azərbaycan Texniki Universitetində (AzTU) 9 idman növü üzrə 3 həftədən çox davam edən spartakiada yarışları başa çatıb. Yarışların başa çatması münasibəti ilə mükafatlandırma mərasimi keçirilib.
AzTU-nun Tərbiyə işləri üzrə prorektoru İsa Xəlilov çıxış edərək ümümmilli lider Heydər Əliyevin idmana göstərdiyi diqqət və qayğıdan danışaraq yarışların qaliblərini təbrik edib, onlara gələcəkdə daha böyük uğurlar arzulayıb.
Daha sonra qalib komadalar mükafatlandırılıb. Mükafatlandırma zamanı məlum olub ki, tələbələr arasında keçirilən yarışda birinciliyə Avtomatika və kompyuter texnikası fakültəsinin komandası layiq görülüb. Maşınqayırma, Elektrotexnika və energetika fakültələrinin komandaları isə ardıcıl olaraq 2-ci və 3-cü yerlə kifayətlənməli olublar.
Əməkdaşlar arasında keçirilən yarışlarda isə birinciliyə Elektrotexnika və energetika fakültəsinin komandası yüksəlib. Bu yarışlarda 2-ci yerə Mühəndis biznesi və menecment, 3-cü yerə isə Maşınqayırma fakültəsinin komadası layiq görülüb.
Qaliblərə kubok, medal, həmçinin üzərində Ulu Öndərin şəkli əks olunan medallar təqdim olunub.
Yarışlarda fəallıq göstərən 6 iştirakçı da medalla təltif olunub. Bundan əlavə AzTU-nun rektoru, professor Havar Məmmədov spartakiadanın təşkilat komitəsi tərəfindən, göstərdiyi köməyə və yaradılan şəraitə görə kubok və diplomla mükafatlandırılıb.

AzTU-nun Mətbuat Xidməti