İngilis dili olimpiadasının qalibləri mükafatlandırılıb

İngilis dili olimpiadasının qalibləri mükafatlandırılıb Paytaxt məktəbliləri IV ingilis dili olimpiadasında iştirak ediblər.
Olimpiada Təhsil Nazirliyi, ADA Universiteti, Bakı Təhsil və İnformasiya Mərkəzi, Təhsildə İnnovativ Texnologiyalar Əlavə Təhsil Mərkəzinin birgə təşkilatçılığı ilə X-XI sinif şagirdləri arasında keçirilib.
Olimpiada istedadlı şagirdləri üzə çıxarmaq, onları ingilis dilinin tədrisinə daha da həvəsləndirmək, uğurlu peşəkar karyera qurmaq məqsədilə akademik ingilis dili biliklərinə yiyələmələrinə kömək etmək məqsədilə təşkil edilib.
İki mərhələdən ibarət olan olimpiadada Bakı şəhəri üzrə 164 məktəbdən 556 şagird iştirak edib. Birinci mərhələdə iştirakçılar ingilis dilinin qrammatikası və oxu üzrə bacarıqlarına dair 50 yazılı sualı cavablandırıblar. İkinci mərhələyə müvəffəqiyyətlə keçən 108 şagirdin yazı və dinləmə bacarıqları qiymətləndirilib.
Olimpiadada paytaxtdakı 10, 82, 257 nömrəli tam orta məktəblər, 287 nömrəli Zəkalar liseyi və məktəb-lisey kompleksi fərqlənib.
Qaliblərin mükafatlandırılma mərasimində Bakı Şəhəri üzrə Təhsil İdarəsinin müdir müavini Hüseyn Əsgərov qalibləri təbrik edib. Müdir müavini olimpiada iştirakçılarının hər birinin təşəbbüskarlığını yüksək dəyərləndirib.
Olimpiadada I yerin qalibi Böyük Britaniyada yerləşən “Stonar School” məktəbində bir həftəlik ingilis dili kursunda ödənişsiz iştirak etmək hüququ, II yerin qalibi noutbuk və ADA Universitetinin ingilis dili üzrə yay məktəbində təhsil haqqına 75 faiz güzəşt, III yerin qalibi isə planşet və ADA Universitetinin ingilis dili üzrə yay məktəbində təhsil haqqına 50 faiz güzəşt qazanıb.

BŞTİ-nin Mətbuat Xidməti

Oxşar xəbərlər