Allah Təala Ramazan ayının orucunu vacib edərək, insanların ixtiyarına İlahi qürb məqamına çatmaq üçün yaxşı fürsətlər qoymuşdur. Orucun cismi, əxlaqi və fərdi təsirləri olduğu kimi, ictimai təsirləri də vardır. Hər şeydən əvvəl, oruc insanın təqvasını gücləndirər.

Orucun ictimai təsirlərini tanıyaq:

1. Yoxsullarla həmdərd olmaq. Oruc tutan insan yoxsulların çəkdiyi əziyyətləri qısa müddətdə də olsa, hiss edər və ona görə də onlarla həmdərd olmağa çalışar. Ac və susuz insan yoxsulun halını daha yaxşı dərk edər və insanların haqqını zay etməməyə çalışar. Belə bir insan məhrumiyyətin nə demək olduğunu anlayar. İmam Sadiq (ə) buyurur: “Oruc ona görə vacib buyurulmuşdur ki, zənginlə yoxsul arasında bərabərlik yaransın. Ona görədir ki, zəngin aclıq dadını hiss etsin və yoxsullara qarşı haqqı əda etsin. Çünki zənginlər nə istəsələr, onlar üçün hazır olar. Allah istəyir ki, bəndələri arasında bərabərlik olsun. Aclığın dadını zənginlərə hiss etdirsin ki, onlar zəiflərə və aclara rəhm etsinlər”.
2. Gözəl rəftar. Oruc insanda mənəvi zəminələri gücləndirər və insanı ictimai anamaliyalardan uzaqlaşdırar. Belə bir insan başqaları ilə gözəl rəftar edər və hüsnü-əxlaq nümayiş etdirər. İnsanlar adətən iftar süfrələrində ünsiyyət qurar və bir-birinə yaxınlaşarlar.
3. Cəmiyyətdə mənəvi fəza icad olar. Oruc insanın təqvasını gücləndirər və özünə hakim olmasına səbəb olar. Bir çox fərdi və ictimai günahlar iki kökdən qaynaqlanar: qəzəb və şəhvət. Oruc o ibadətlərdəndir ki, bu iki rəzil sifətlərin qarşısını alar və cəmiyyətdə fəsadı azaldar.

Təbiidir ki, o cəmiyyətdə ki, insanların əksər hissəsi oruc tuturlar, daha çox mənəvi fəzaya malik olarlar. Belə bir fəza həmdərdliyi, ictimai həmkarlığı gücləndirər, ictimai ziyanları azaldar.

Tehsil-press.az