Birləşmiş Nüvə Tədqiqatları İnstitutunun (BNTİ) 60 illiyinə həsr edilmiş tədbirlər çərçivəsində adıçəkilən institutun direktor müavini və MDB ölkələrinin Nanotexnologiya üzrə innovasiya mərkəzinin direktoru Aleksandr Ruzayev, BNTİ-nin Elmi tədqiqat və tədris mərkəzinin direktoru, f.r.e.d. Stanislav Z.Pakulyak, Belarusiya Dövlət Universitetinin Nüvə Problemləri İnstitutunun direktor müavini, f.r.e.d. Yliya A.Fedotova Bakı Dövlət Universitetində olublar. Rektor, akademik Abel Məhərrəmovla görüşdə BDU ilə BNTİ-nin arasında mövcud əməkdaşlığın perspektivlərindən, BNTİ-nin elmi texniki imkanlarından, Fizika fakültəsində aparılan elmi tədqiqat işlərindən, nüvə texnologiyası istiqamətində magistr hazırlığından danışılıb. Fizika fakültəsinin dekanı, professor Məhəmmədəli Ramazanov qonaqlara tədris və elmi laboratoriyalar haqqında məlumat verib.
BNTİ-nin Elmi tədqiqat və tədris mərkəzinin direktoru, f.r.e.d. Stanislav Z.Pakulyak fakültənin professor-müəllim və tələbələri qarşısında çıxış edib. Məlum olub ki, BNTİ tələbə, magistr, doktorant və müəllimlər üçün stajartırmalar təşkil edir və fakültə əməkdaşlarının bu imkanlardan yararlanmaları əlaqələrin daha da yaxşılaşmasına səbəb ola bilər.
Sonda qonaqlar Nanoaraşdırmalar Mərkəzinə baş çəkib, burada aparılan işlərlə yaxından tanış olublar.

Mətbuat və informasiya şöbəsi