AMEA-nın Botanika İnstitutunun Elmi şurasında müəssisənin fəaliyyətinə dair bir sıra məsələlər müzakirə olunub.
İclası açan institutun direktoru akademik Validə Əlizadə xüsusi karantin rejimi müddətində müəssisənin elmi-təşkilati fəaliyyəti barədə məlumat verib. 2020-ci ilin yarımillik hesabatlarına dair hazırlıq işlərinə başlanıldığını qeyd edən akademik ekspedisiyaların bərpası, həmçinin “Qırmızı kitab”ın üçüncü nəşri üçün seçilmiş bitki və göbələk növlərinə dair vacib məlumatların toplanılması üzrə müəyyən tapşırıqlar verib.
İnstitutun elmi katibi biologiya üzrə fəlsəfə doktoru Xuraman Xəlilova elmi şura üzvlərinə Azərbaycan Respublikasında bioloji müxtəlifliyin qorunması və davamlı istifadəsinə dair 2017-2020-ci illər üçün Milli Strategiyanın Tədbirlər Planını xatırladıb. İnstitutun müvafiq şöbə və laboratoriyalarının hesabatlarında Tədbirlər Planının strateji məqsədləri, milli hədəfləri və fəaliyyətlərini nəzərə almağın zəruriliyini vurğulayıb.
Mikologiya laboratoriyasının müdiri biologiya elmləri doktoru Dilzarə Ağayeva “Plant and Fungal Research” jurnalının 4-cü nəşrinin tərtibatı üzrə aparılan işlərdən danışıb. Həmçinin Azərbaycan Botaniklər Cəmiyyətinin elmi əsərlərinin çap olunmasına dair məsələləri diqqətə çatdırıb.

Tehsil-press.az