Bakı Dövlət Universitetində (BDU) müstəqilliyimizin bərpasının 30 illiyinə və Qarabağ Zəfərinin birinci ildönümünə həsr olunmuş “Qarabağ Azərbaycandır! Zəfər epopeyası” kitabının təqdimat mərasimi keçirilib.
Təqdimat mərasimində BDU-nun rektoru Elçin Babayev çıxış edərək Azərbaycan Prezidenti, Ali Baş Komandan İlham Əliyevin rəhbərliyi ilə rəşadətli Ordumuzun 44 günlük Vətən müharibəsində qazandığı tarixi Zəfər haqqında danışıb. Şanlı Qələbənin qazanılmasında müasir Azərbaycan gəncliyinin əvəzsiz rolu olduğunu xüsusi vurğulayıb. Rektor bildirib ki, Ali Baş Komandan İlham Əliyevin rəhbərliyi ilə 44 günlük Vətən müharibəsində müzəffər ordumuz, qüdrətli xalqımız tariximizin yeni və şanlı salnaməsini yazdı, Ulu Öndərimizin ən böyük arzusu həyata keçirildi.
Elçin Babayev Vətən müharibəsində şanlı Qələbəmizin əsasını təşkil edən xalq-iqtidar birliyinin təməlinin ulu öndər Heydər Əliyevin hakimiyyəti illərində qoyulduğunu vurğulayaraq qeyd edib ki, Ümummilli Liderimizin axıra çatdırmaq istədiyi ən taleyüklü məsələ doğma torpaqlarımızın azad edilməsi idi. Müqəddəs ata vəsiyyətini şərəflə yerinə yetirən Prezidentimiz, yenilməz sərkərdəmiz İlham Əliyev Azərbaycan Ordusu və xalqı ilə birlikdə 44 günlük Vətən müharibəsində parlaq Qələbə qazandı.
BDU-nun Tarix fakültəsinin professoru İbrahim Zeynalovun moderatorluğu ilə keçirilən tədbirdə Milli Məclisin deputatı, BDU-nun kafedra müdiri Anar İsgəndərov, Milli Məclisin deputatı, BDU-nun professoru Musa Qasımlı, Milli Məclisin deputatı Naqif Həmzəyev, BDU-nun kafedra müdiri akademik Yaqub Mahmudov, Tarix fakültəsinin tələbəsi, Vətən müharibəsi qazisi Gündüz Orucov çıxış ediblər. Çıxışlarda Vətən müharibəsinin tariximizin ən parlaq səhifəsi olduğu, Azərbaycan Ordusunun gücü, qüdrəti sayəsində qazanılmış Qələbənin ədalətin təntənəsi olduğu bildirilib. Vətən müharibəsində Azərbaycan xalqının öz rəhbərinin və Ordusunun yanında olması, bir yumruq kimi birləşməsinin Qələbəni təmin edən əsas amil olduğu vurğulanıb. Prezident İlham Əliyevin çoxşaxəli fəaliyyətindən, Azərbaycanın inkişafı, müstəqilliyimizin qorunması və milli dövlətçiliyimizin gücləndirilməsi istiqamətində misilsiz xidmətlərindən danışılıb.
Təqdimatı keçirilən kitabda Azərbaycanın əzəli torpağı olan Qarabağın ən qədim çağlardan müasir dövrə kimi tarixinə ümumi bir nəzər salınıb, Qarabağın ərazisi, əhalisi, inzibati-ərazi bölgüsü, sosial-iqtisadi vəziyyəti və siyasi həyatı, o cümlədən XX əsrin 20-ci illərində Azərbaycan SSR-in tərkibində qondarma DQMV-nin yaradılması və bunun ağır nəticələri ilk mənbələr, arxiv sənədləri və mövcud ədəbiyyatlar əsasında geniş şəkildə təhlil olunub, ermənilərin Qarabağın dağlıq hissəsini Azərbaycandan ayırmaq üçün irəli sürdüyü ərazi iddialarının əsassızlığı mötəbər mənbələr əsasında sübut olunub. Kitabda XX əsrin 80-90-cı illərində Ermənistanın işğalçılıq siyasəti nəticəsində Dağlıq Qarabağ münaqişəsinin meydana gəlməsi, Birinci Qarabağ savaşı və onun nəticələri, Azərbaycan ərazisinin böyük bir hissəsinin təcavüzkar Ermənistan dövləti tərəfindən işğal olunması, Ermənistanda və Qarabağ bölgəsində azərbaycanlılara qarşı aparılan etnik təmizləmə və soyqırımı siyasəti, dinc əhaliyə qarşı terror, mədəniyyət abidələrimizə qarşı vandalizm aktları, ATƏT-in Minsk qrupunun münaqişəsinin həlli sahəsində səmərəsiz fəaliyyəti tədqiq edilib.
Qeyd edək ki, kitabın layihə rəhbəri BDU-nun professoru İbrahim Zeynalov, elmi məsləhətçiləri akademik Yaqub Mahmudov və professor Anar İsgəndərovdur.
Kitab ali məktəblərdə tarix, siyasi və beynəlxalq münasibətlər fənlərindən dərs deyən müəllimlər, bakalavr pilləsində təhsil alan tələbələr, magistrlər, elmi işçilər və Azərbaycanın müasir tarixinə maraq göstərən oxucular üçün nəzərdə tutulub.

Tehsil-press.az