Məktəbdənkənar təhsil müəssisələrində 20 Yanvar faciəsinə həsr olunmuş silsilə tədbirlər keçirilib

Məktəbdənkənar təhsil müəssisələrində 20 Yanvar faciəsinə həsr olunmuş silsilə tədbirlər keçirilib Təhsil Nazirliyinin birbaşa tabeliyində fəaliyyət göstərən uşaq-gənclər inkişaf mərkəzləri və uşaq-gənclər idman-şahmat məktəbləri tərəfindən 20 Yanvar faciəsinin otuz ikinci ildönümünə həsr olunmuş tədbirlər keçirilib.
1 nömrəli Uşaq-Gənclər İnkişaf Mərkəzi tərəfindən “Ağla qərənfil ağla” mövzusunda sərgi açılıb, “ Qan yaddaşımız 20 Yanvar” adlı ədəbi-bədii tədbir keçirilib. Həmçinin 2 nömrəli Uşaq-Gənclər İnkişaf Mərkəzi tərəfindən "Tarixin qan yaddaşı” adlı guşə, “Azadlığa gedən yolun zirvəsi” ədəbi-bədii tədbir və rəsm işlərindən ibarət sərgi, 3 nömrəli Uşaq-Gənclər İnkişaf Mərkəzi tərəfindən “Unudulmayan tarixin qəhrəmanları" rəsm sərgisi, “Şəhid adı müqəddəsdir” adlı ədəbi-bədii kompozisiya, Azərbaycan İstiqlal Muzeyinə ekskursiya və digər tədbirlər həyata keçirilib.
Həmçinin bu mərkəzlər tərəfindən dərnək üzvlərinin iştirakı ilə açıq dərslər, dəyirmi masalar, Şəhidlər xiyabanına ziyarətlər təşkil edilib.
Uşaq-gənclər idman-şahmat məktəblərində məşqlərdə idmançılara 20 Yanvar faciəsi haqqında məlumat verilib. Müxtəlif idman növləri üzrə 20 Yanvar faciəsinin otuz ikinci ildönümünə həsr olunmuş yarışlar keçirilib.
Qeyd edək ki, tədbirlərin keçirilməsində əsas məqsəd Azərbaycan Respublikasının müstəqilliyi uğrunda mübarizə tarixinə qəhrəmanlıq səhifəsi kimi həkk olunmuş, xalqımızın qan yaddaşında silinməz iz qoymuş 20 Yanvar faciəsinin qəhrəmanlarının əziz xatirəsinin dərin ehtiramla yad edilməsidir. Həmçinin Azərbaycan xalqının iradəsini, milli azadlıq uğrunda mübarizə əzmini əks etdirən dövr barədə dərnək üzvlərinin məlumatlandırılması, gənc nəslin milli qəhrəmanlıq, vətənpərvərlik ruhunda tərbiyə edilməsidir.

Tehsil-press.az


Oxşar xəbərlər