Yaponiyanın Azərbaycandakı səfirliyinin əməkdaşları Azərbaycan Dövlət Mədəniyyət və İncəsənət Universitetində olublarAzərbaycan Dövlət Mədəniyyət və İncəsənət Universitetində (ADMİU) Yaponiyanın Azərbaycandakı səfirliyinin əməkdaşları tərəfindən Yapon kimonosunun tarixi və xüsusiyyətləri haqqında ustad dərsi keçirilib.
Əvvəlcə ADMİU-nun Rəssamlıq fakültəsinin dekanı, sənətşünaslıq üzrə fəlsəfə doktoru, dosent Səyalı Quliyeva, Teatrşünaslıq kafedrasının müdiri, Əməkdar incəsənət xadimi, professor Aydın Talıbzadə, o cümlədən Yaponiyanın ölkəmizdəki səfirliyinin birinci katibi Amada Şuniçi çıxış edərək, qədim yapon geyim ənənəsini ehtiva edən kimononun çoxəsrlik tarixindən, onun yapon xalqının həyatındakı mühüm rolundan bəhs ediblər.
Sonra İslam və türk incəsənət tarixçisi, “SOAC Art Consultancy & Curation” şirkətinin rəhbəri Dr. Sumiyo Okumura ADMİU-nun Geyim dizaynı ixtisası üzrə təhsil alan tələbələrinə “Kimono və kimono tarixi haqqında” mövzusunda türk dilində ustad dərsi keçib. Dərsdə tələbələrə kimono və onun yaranma tarixi, kimononun növləri və xüsusiyyətləri haqqında geniş məlumat verilib.
Daha sonra isə Mika Şimojo tərəfindən kimono geyimi üzrə ustad dərsi keçirilib.
Qeyd edək ki, ustad dərslərinin keçirilməsində məqsəd kimononun yapon xalqının həyatındakı rolu, onun yarandığı gündən dövrümüzədək necə qorunub saxlanması və hansı dəyişikliklərə məruz qalması haqqında tələbələrə məlumat vermək idi.
Tədbirin ikinci hissəsində isə ADMİU-nun Dizayn və dekorativ tətbiqi sənət kafedrasının baş müəllimi Nəzakət Səfərovanın rəhbərliyi ilə tələbə Məleykə Baxşıyevanın hazırladığı “Qarabağım məxmər içində” başlıqlı slayd nümayiş etdirilib.
Tehsil-press.az
