Bakı Dövlət Universitetinin (BDU) “Heydər Əliyev İli” ilə bağlı Tədbirlər Planına uyğun olaraq müstəqil Azərbaycan dövlətinin qurucusu, Ümummilli Lider Heydər Əliyevin zəngin həyat və fəaliyyətini əks etdirən çoxsaylı tədbirlər həyata keçiriləcək. Həmin tədbirlərdən biri də “BDU könüllüləri” təşkilatının icra edəcəyi “Heydər Əliyev mühazirələri” layihəsidir.
Martın 1-dən başlayaraq dekabrın 20-dək davam edəcək layihə Ulu Öndər Heydər Əliyevin fəaliyyətinin bütün mərhələlərini, milli dövlətçilik ideyalarını gənclərə aşılamaq məqsədi daşıyır.
Dövlətçilik salnaməmizdə silinməz izlər qoymuş, azərbaycanlı olması ilə ömür boyu fəxr etmiş, milli qürur və iftixar mənbəyimiz olan Ümummilli Lider Heydər Əliyev bütün dünyada Azərbaycanın rəmzi kimi qəbul edilir. Müstəqil Azərbaycan Ulu Öndərin nəsillərə əmanəti, onun zəngin və çoxşaxəli fəaliyyəti isə xalqımızın milli sərvətidir. Bu müqəddəs mirası qoruyub saxlamaq hər bir azərbaycanlının şərəfli vəzifəsidir.
Layihə çərçivəsində tanınmış ictimai-siyasi xadimlər, hökumət nümayəndələri və dahi rəhbər ilə yaxından tanış olmuş şəxslər Ümummilli Liderin siyasi kursunun incəlikləri və onun əsasını qoyduğu azərbaycançılıq ideologiyası, milli dövlətçilik fəlsəfəsini tam mahiyyəti ilə tələbə və şagirdlərə çatdıracaqlar.

Tehsil-press.az