Qırxdan çox ölkədən istedadlı şagirdlərin qatıldığı yarışın illik çempionlar turnesinə ABŞ-ın nüfuzlu təhsil ocaqlarından biri olan Yel Universiteti ev sahibliyi edib.
Universitetin “Woolsey Hall” auditoriyasında baş tutan açılış mərasimində Azərbaycanın ABŞ-da fəaliyyət göstərən səfirliyinin diplomatları, habelə Tanzaniya, Malayziya, Rumıniya, Tailand və Qazaxıstanın diplomatik nümayəndəliklərinin təmsilçiləri, Yel Universitetinin professor və tələbə heyəti və şəhər meriyasının rəsmiləri iştirak ediblər.
Yarışda Azərbaycan nümayəndə heyəti iki məktəbdən ibarət (Oxbridge Akademiyası və Avropa Azərbaycan Məktəbi) komanda ilə təmsil olunur. Gənc istedadlar noyabrın 8-dək mövsümün son çempionlar turnirində öz bilik və bacarıqlarını sınayacaqlar.
Mərasimdə çıxış edən Azərbaycanın Vaşinqtondakı səfirliyinin diplomatı Mahmud Seyidov nüfuzlu yarışda ölkəmizi təmsil edən şagirdləri salamlayıb və onlara finalda uğurlar diləyib. Diplomat bu böyük uğurun Azərbaycanın təhsilə verdiyi diqqət və qayğısının təcəssümü olduğunu vurğulayıb.
Olimpiada çərçivəsində Azərbaycan səfirliyinin dəstəyi və ölkəmizin komandasının birgə təşkilatçılığı ilə Yel Universitetində Azərbaycan guşəsi yaradılacaq.
Azərbaycanlı şagirdlər universitetin tələbələri və turnirdə iştirak edən xarici ölkədən olan şagirdləri Azərbaycan tarixi, mədəniyyəti və incəsənəti barədə məlumatlandıracaqlar.
Qeyd edək ki, “The World Scholar’s Cup”ın birinci regional mərhələsi bu ilin əvvəlində Bakıda keçirilib və paytaxt 800-dən çox şagirdin gərgin elm mübarizəsinə şahidlik edib. Növbəti mərhələdə Londonda keçirilən raundda nailiyyət əldə edənlər hazırkı final mərhələsində iştirak etməyə vəsiqə qazanıblar. Olimpiadanın sonunda mükafatlandırma mərasimi keçiriləcək.

Tehsil-press.az