“Heydər Əliyev İli” çərçivəsində Bakı Dövlət Universitetində (BDU) Yeni Azərbaycan Partiyasının (YAP) Yasamal rayon təşkilatı və “Z.Xəlilov küçəsi 33” (BDU) ünvanı üzrə ərazi partiya təşkilatı ilə birgə “Heydər Əliyev ideyaları - Yeni Azərbaycanın dövlətçilik irsi” adlı tədbir keçirilib.Əvvəlcə Azərbaycan Respublikasının Dövlət Himni səsləndirilib.
Ümummilli Lider Heydər Əliyevin və şəhidlərin əziz xatirəsi anılıb.
Tədbirdə çıxış edən “Z.Xəlilov küçəsi 33” (BDU) ünvanı üzrə ərazi partiya təşkilatının sədri Zahid Cəfərov bildirib ki, Ulu Öndər Heydər Əliyevin Vətən və xalq qarşısında tarixi xidmətləri əvəzsizdir. Xalqının və dövlətinin mənafeyini daim üstün tutan Ümummilli Liderimiz müstəqil Azərbaycan dövlətinin memarı və qurucusudur. Ulu Öndər daim Azərbaycanı düşünüb, onun müasirləşməsinə, qüdrətlənməsinə çalışıb.
YAP Veteranlar Şurasının üzvü Şahlar Əsgərov qeyd edib ki, fəaliyyətinin hər dövründə Ulu Öndərin müqəddəs istəyi xalqın birliyinə söykənən güclü, möhtəşəm, qüdrətli dövlətin yaradılması olub. Azərbaycanda dövlətçilik ənənələrinin bərpa edilib zənginləşdirilməsi, müstəqilliyimizin möhkəmləndirilməsi, onun əbədi, dönməz xarakter alması, ölkəmizin dinamik iqtisadi inkişaf yolu ilə inamla irəliləməsi, beynəlxalq nüfuzunun artması Ümummilli Liderin fəaliyyəti sayəsində mümkün olub. Ulu Öndərin siyasi kursu Prezident İlham Əliyev tərəfindən uğurla və inamla davam etdirilir, güclü və nüfuzlu Azərbaycan yeni zirvələr fəth edir.
YAP Təftiş komissiyasının üzvü, Milli Məclisinin deputatı Sadiq Qurbanov vurğulayıb ki, Ümummilli Lider Heydər Əliyev milli dövlətçilik ideyalarını hər şeydən üstün tutub. O, müasir müstəqil Azərbaycanı, onun bugünkü gerçəkliklərini yaradıb və gələcəyə aparan yolları müəyyən edib.
YAP Yasamal rayon təşkilatının sədri Bəxtiyar Nəbiyev diqqətə çatdırıb ki, Ulu Öndər Heydər Əliyevin həm SSRİ dönəmində, həm də müstəqillik illərində ölkəmizə rəhbərliyi zamanı xalqın rifahının daha da yaxşılaşdırılması, respublikamızın tərəqqisinin təmin olunması və digər istiqamətlərdə tarixi əhəmiyyətə malik misilsiz işlər görülüb. Bu gün müasir, müstəqil Azərbaycan Ulu Öndərin ideyaları əsasında inkişaf edir. Müzəffər Ali Baş Komandan İlham Əliyevin rəhbərliyi ilə rəşadətli Ordumuz Vətən müharibəsi zamanı torpaqlarımızı işğaldan azad etdi. Oktyabrın 15-də Xankəndi və digər ərazilərimizdə Müzəffər Ali Baş Komandanın Azərbaycanın Dövlət Bayrağını ucaltması tarixi Zəfərimizin zirvəsi oldu. Bütün bunların fövqündə əsası Ulu Öndər Heydər Əliyev tərəfindən qoyulan və Prezident İlham Əliyev tərəfindən davam etdirilən, güclü siyasi iradəyə söykənən müstəqil strateji kurs dayanır.
BDU-nun Mexanika-riyaziyyat fakültəsinin dekanı Ziyatxan Əliyev, dosent Şamo Cəbrayılov və Mexanika-riyaziyyat fakültəsinin II kurs tələbəsi Murad Muradlı çıxışlarında qeyd ediblər ki, XX əsrin sonlarında müstəqillik qazanan Azərbaycan Respublikasının mövcudluğu və dünyanın sürətlə inkişaf edən ölkələrindən birinə çevrilməsi Ümummilli Liderin tarixi fəaliyyətinin nəticəsidir.
Tədbirdə bir qrup partiya fəalına fəxri fərmanlar və partiya sıralarına yeni qəbul olunanlara üzvlük vəsiqələri təqdim olunub.
Tehsil-press.az
