Azərbaycan İlahiyyat İnstitutu (Aİİ), Bakı Yunus Əmrə İnstitutu, Kırıkkale Universiteti və prof. Fuat Sezgin İslam Elm Tarixi Araşdırmaları Fondunun 29 noyabr 2019-cu il tarixdə birgə keçirdiyi “Müsəlman alimlərinin elm və texnologiyanın inkişafına töhfələri” mövzusunda konfransın iştirakçıları Aİİ-ni ziyarət ediblər.
Aİİ rektoru Ceyhun Məmmədov qonaqları salamlayaraq, onları ali təhsil müəssisəsində görməkdən məmnunluğunu ifadə edib. İnstitut rəhbəri ümummilli lider Heydər Əliyevin ölkədə dini fəaliyyət sahəsində sabitliyə nail olunması, konfessiyalar arasında dözümlülük mühitinin qorunub saxlanılması və möhkəmləndirilməsi istiqamətində gördüyü misilsiz işlər haqqında qonaqlara məlumat verib.
C.Məmmədov bildirib ki, Azərbaycan Respublikasının Prezidenti cənab İlham Əliyev Ulu Öndər Heydər Əliyevin dövlət-din siyasətini böyük uzaqgörənliklə davam etdirir. Qeyd edib ki, Azərbaycan İlahiyyat İnstitutunun yaradılması da bu siyasətin uğurlarının məntiqi davamıdır.
Ali təhsil müəssisəsi haqqında məlumat verən rektor vurğulayıb ki, İnstitutda təhsil tam ödənişsizdir, tələbələrin bütün ehtiyacları dövlət tərəfindən qarşılanır.
C.Məmmədov bildirib ki, ali təhsil müəssisəsində bütün dinlərin tarixi, inanc və ibadət sistemi tədris olunur. Eyni zamanda, ingilis və ərəb dilləri müasir metodlar əsasında – 4 dil bacarığının (oxuma, dinləmə, danışma, yazma) inkişafı istiqamətində tədris edilir.
Aİİ rektoru qeyd edib ki, İnstitut xarici ölkə universitetləri ilə əlaqələrin qurulmasında maraqlıdır. İlahiyyat sahəsində ixtisaslaşmış bir çox xarici ölkə universitetləri ilə əməkdaşlıq protokollarının imzalandığını vurğulayan rektor diqqətə çatdırıb ki, əsas məqsəd qarşılıqlı mübadilə proqramları vasitəsilə tədris metodunun və təcrübənin öyrənilməsidir.
Konfrans iştirakçıları səmimi qarşılanmaya görə Aİİ rəhbərliyinə minnətdarlıqlarını bildirib, Azərbaycanda tolerant mühitin mövcudluğundan məmnunluqlarını ifadə ediblər.
Konfrans iştirakçıları Azərbaycan İlahiyyat İnstitutu ilə yaxından tanış olublar. Onlara Aİİ-nin fəaliyyət istiqamətləri, məqsədləri haqqında geniş məlumat verilib. Aİİ-nin kitabxanasını ziyarət edən konfrans iştirakçılarına burada 16000-dən çox kitabın saxlanıldığı bildirilib.
Qonaqlar Azərbaycan İlahiyyat İnstitutunun yaradılmasını, həmçinin burada bütün dinlərin tədris olunmasını yüksək qiymətləndiriblər.
Görüşdə əməkdaşlıq əlaqələrinin qurulması, qarşılıqlı maraq doğuran məsələlərin müzakirəsi aparılıb.

Aİİ-nin Mətbuat Xidməti