Azərbaycan Dövlət Neft və Sənaye Universitetində (ADNSU) yuxarı kurs tələbələri və təhsil müəssisəsinin məzunları üçün IX məzun-karyera sərgisi keçirilib.
Qlobal koronavirus pandemiyasının hələ də hökm sürdüyünü nəzərə alaraq sərgi Azərbaycan Respublikasında elan edilmiş karantin rejimi şəraitində onlayn formatda keçirilib. Sərgidə 56 dövlət qurumu və özəl şirkət tərəfindən 233 vakant iş yeri təqdim olunub.
Tədbirdə çıxış edən ADNSU-nun rektoru, professor Mustafa Babanlı dövlət və şirkət nümayəndələrinə təşəkkürünü bildirib. O, Azərbaycanın işğal altında olan torpaqlarının azad edilməsi, xalqımızın Vətən müharibəsində tarixi zəfər qazanması münasibətilə iştirakçıları təbrik edib, torpaqlarımızın azadlığı uğrunda şəhid olan əsgər və zabitlərimizə Allahdan rəhmət diləyib.
ADNSU-da müasir sənaye və iqtisadiyyatın tələblərinə uyğun kadrların yetişdirildiyini söyləyən rektor universitetdə ənənəvi olaraq keçirilən məzun-karyera sərgilərinin gənc mütəxəssislərin birbaşa şirkət nümayəndələri ilə təmas qurmasında və işlə təmin olunmasında mühüm platforma olduğunu diqqətə çatdırıb. M.Babanlı koronavirus epidemiyasının geniş yayılması və bununla bağlı ölkədə görülən qabaqlayıcı tədbirlərə uyğun olaraq universitetdə tədrisin onlayn formatda keçirildiyini, eyni zamanda, ADNSU-nun İT sahəsində indiyə qədər əldə etdiyi təcrübənin onlayn tədrisin keyfiyyətinə müsbət təsir etdiyini deyib.
Sərgidə iştirak edən şirkətlərdən və dövlət qurumlarından Energetika Nazirliyinin Dövlət qulluğu sektorunun müdiri Xəyalə Qurbanova, Qida Təhlükəsizliyi Agentliyinin Kadrlar şöbəsinin müdiri Zaur İsmayılov, “Azərenerji” ASC-nin İnsan Resursları Departamentinin mütəxəssisi Çinarə Qurbanova, “AzərGold” QSC-nin insan resursları üzrə aparıcı mütəxəssisi Valid Əliyev, “Baktelekom” MMC-nin İnsan Resurslarının İdarə Edilməsi Departamentinin baş mütəxəssisi Nigar Rəsulova çıxış edərək vakant iş yerləri barədə məlumat veriblər.
Sərgi ADNSU-nun tələbə və məzunlarının fəallığı şəraitində diskussiya ilə davam edib, onların sualları cavablandırılıb.
ADNSU-nun tələbə və məzunları career.asoiu.edu.az linki vasitəsilə universitetin rəsmi saytında yer alan Məzun-Karyera Mərkəzinə daxil olub vakant yerlərlə tanış ola, müvafiq şirkət və daha sonra vəzifəni seçib CV-lərini göndərə bilərlər.
Qeyd edək ki, career.asoiu.edu.az saytı cari il iyunun 11-də ADNSU-nun onlayn formatda keçirilən VIII məzun-karyera sərgisi zamanı yaradılıb.

Tehsil-press.az