Rusiyanın Həştərxan Dövlət Universitetinin rektoru Markelov Konstantin və beynəlxalq əlaqələr üzrə prorektoru Fadina Anqelina Azərbaycan Texniki Universitetində (AzTU) olub.
Səfər çərçivəsində qonaqlar AzTU-nun rektoru Vilayət Vəliyevlə görüşüb və iki universitet arasında mövcud əməkdaşlığın perspektivləri haqqında fikir mübadiləsi aparıblar.
Görüşdə elm və tədqiqat yönümlü layihələrin birgə işlənməsi, iki universitetin professor-müəllim heyətinin təcrübə mübadiləsi aparması əsas müzakirə mövzusu olub. Həmçinin hər iki universitetin üzv olduğu Xəzəryanı Ölkələrin Dövlət Universitetləri Assosiasiyasının fəaliyyəti çərçivəsində Xəzər dənizi və onun hövzəsi üzrə aparılan elmi-tədqiqat işləri və layihələrin icrası üzrə əməkdaşlığın genişləndirilməsi istiqamətində də təkliflər səsləndirilib.
Xatırladaq ki, AzTU 2018-ci ildən Həştərxan Dövlət Universiteti ilə əməkdaşlıq edir.

Tehsil-press.az