Azərbaycan Dövlət İqtisad Universitetinin (UNEC) rektoru professor Ədalət Muradov “2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində xarici ölkələrin ali məktəblərində təhsil alan doktorantlar ilə görüşüb.
Rektor Türkiyə, Böyük Britaniya və Portuqaliyanın ali təhsil müəssisələrində doktorantura təhsili alan gənclərlə təhsillərinin mövcud vəziyyətini müzakirə edib. Görüşdə UNEC-in İnkişaf Strategiyasının əsas hədəfləri və bu istiqamətdə gənc müəllimlərin qarşısında duran vəzifələr barədə fikir mübadiləsi aparılıb. Məzunların bilik və bacarıqlarla yanaşı, dəyərlərə də sahib olmalarının vacibliyinə toxunan professor Ədalət Muradov bu istiqamətdə gənc müəllimlərin üzərinə böyük məsuliyyət düşdüyünü bildirib, onlara təşəbbüskar olmağı tövsiyə edib.
Sonra Beynəlxalq Magistratura və Doktorantura Mərkəzinin direktoru dosent Fariz Əhmədov, Doktorantura şöbəsinin müdiri İlqar Seyfullayev və doktorantlar təhsillərinin mövcud durumu barədə məlumat veriblər, təkliflər səsləndiriblər.

Tehsil-press.az