Milli Azərbaycan Tarixi Muzeyinin Sənədli mənbələr fondunda Azərbaycan tarixçisi, şərqşünas-alim, akademik Əbdülkərim Əlizadəyə məxsus müxtəlif dəyərli materiallar - fotoşəkillər və sənədlər qorunur.
Ə.Əlizadə 1906-cı il yanvarın 11-də Bakıda anadan olub. 1930-cu ildə Leninqrad (Sankt-Peterburq) Şərq İnstitutunu bitirib. O, keçmiş SSRİ EA Şərqşünaslıq İnstitutunda, Leninqrad Şərq İnstitutunda, Leninqrad Dövlət Universitetində fəaliyyət göstərib. Ə.Əlizadə 1941-1963-cü illərdə SSRİ EA Azərbaycan filialının Tarix İnstitutunda baş elmi işçi, direktor, Tarix və Fəlsəfə İnstitutunun Qədim və orta əsrlər tarixi şöbəsinin rəhbəri, Azərbaycan Elmlər Akademiyasının İctimai elmlər bölməsinin akademik-katibi vəzifələrində çalışıb.
Tədqiqatçı-alim Azərbaycan Elmlər Akademiyasının Şərqşünaslıq İnstitutunun ilk direktoru olub. Ə.Əlizadə elmi və ictimai fəaliyyətlərinə görə Əməkdar elm xadimi fəxri adına layiq görülüb, müxtəlif orden və medallarla təltif olunub. Alim Varşava, Münhen, Moskva, Ankara və Tehranda beynəlxalq konqreslərdə məruzə ilə çıxış edib. O, 1963-cü ildən ömrünün sonuna kimi Şərqşünaslıq İnstitutunun Mətnşünaslıq və məxəzləri çapahazırlama şöbəsinə rəhbərlik edib.
Ə.Əlizadə 1979-cu ildə Bakıda vəfat edib.

Tehsil-press.az