Türkiyənin Qazi Universitetində keçirilən XXI Beynəlxalq Türk Dünyası Sosial Elmlər Konfransında Bakı Dövlət Universitetinin (BDU) Beynəlxalq münasibətlər və iqtisadiyyat fakültəsinin dekanı, dosent Laçın Abışlı və Dünya iqtisadiyyatı kafedrasının baş müəllimi, iqtisad üzrə fəlsəfə doktoru Qalib Qafarlı “Azərbaycanda təhsilin iqtisadi artıma təsirinin qiymətləndirilməsi” mövzusunda məruzə ilə çıxış ediblər.
Laçın Abışlı, İkram Cəbrayılov və Qalib Qafarlının həmmüəllifi olduqları tədqiqat işində Azərbaycan Respublikasında təhsilin iqtisadi artım üzərində təsirləri haqqında araşdırma aparılıb. Tədqiqatın nəticəsinə əsasən, ali məktəb tələbələrinin sayında 1 faiz artım iqtisadi böyüməni 4,7 faiz, orta ixtisas təhsili müəssisələrində tələbələrin sayında 1 faiz artım 1,7 faiz artırmaqdadır.
Sonra iştirakçıların sualları cavablandırılıb. Məruzəçilərə beynəlxalq sertifikatlar təqdim olunub.
Qeyd edək ki, Beynəlxalq Türk dünyası sosial elmlər konfransı 2003-cü ildən keçirilir və türkdilli ölkələrdə akademik, sosial, iqtisadi və təhsil sahələrində əməkdaşlığı inkişaf etdirmək məqsədi daşıyır. XXI Beynəlxalq Türk dünyası sosial elmlər konfransına 14 ölkədən 160 tədqiqatçı qatılıb.

Tehsil-press.az