BDU-nun Jurnalistika fakültəsində “Zəfərin carçıları” esse müsabiqəsinin qalibləri mükafatlandırılıb

BDU-nun Jurnalistika fakültəsində “Zəfərin carçıları” esse müsabiqəsinin qalibləri mükafatlandırılıb Bakı Dövlət Universitetinin (BDU) Jurnalistika fakültəsinin Tələbə Elmi Cəmiyyətinin təşkilatçılığı ilə keçirilən “Zəfərin carçıları” esse müsabiqəsinin qalibləri mükafatlandırılıb.
Mükafatlandırma mərasimində çıxış edən Jurnalistika fakültəsinin dekanı Vüqar Əliyev xalqımızın tarixi Zəfərindən yazmağın, həmin hissləri ifadə etməyin məsuliyyətli və təsirli olduğunu bildirib. Qeyd edib ki, bütün dünyanı lərzəyə gətirən tarixi qələbəmizi sözlərlə ifadə etmək ölkə jurnalistikasının müqəddəs vəzifəsinə çevrilib. V.Əliyev bu vəzifənin öhdəsindən uğurla gələn tələbə-jurnalistləri təbrik edib və onlara uğurlar arzulayıb.
Jurnalistika fakültəsinin dekan müavinləri Sevinc Əliyeva və Samir Mirzəyev şanlı Zəfərin memarlarının tanıdılmasının önəmini vurğulayıblar. Onlar qeyd ediblər ki, gələcək jurnalistlər daim öz qələmləri ilə müstəqil, bütöv və qalib Azərbaycanın dəyərlərini qorumalı, onlara sadiq olmalı və hörmətlə yanaşmalıdırlar.
Müsabiqənin əsas məqsədi tələbə-gənclərin vətənpərvərlik, azərbaycançılıq və dövlətçilik prinsipləri əsasında tərbiyə olunmasına töhfə vermək, yazı və fikri ifadə bacarıqlarını inkişaf etdirməkdir.
Sonra esse müsabiqəsinin qalibləri diplom və hədiyyələrlə təltif ediliblər. Qalib yazıların mediada dərc olunması təmin ediləcək.

Tehsil-press.az



Oxşar xəbərlər