5 oktyabr Beynəlxalq Müəllimlər Günüdür

5 oktyabr Beynəlxalq Müəllimlər Günüdür Hər ilin 5 oktyabrı ölkəmizdə Beynəlxalq Müəllim Günü kimi qeyd olunur. Arzu edirəm ki, bu gün hər bir insan üçün müəllimə ürəkdən gələn sevgi, məhəbbət, hörmət gününə çevrilsin. Biz hamımız müəllimlərimizə borcluyuq və həyatımız üçün ən qiymətli nemətimizi - övladlarımızı məhz müəllimə əmanət edirik. Unutmaq olmaz ki, müəllim bütün ailələrimizdə sevilən, hörmətlə yada salınan, hər bir insanın həyatında öz işini qoyan insandır. Şagird məktəbi başa çatdırır, müstəqil həyata qədəm qoyur və ömrünün sonuna kimi sevdiyi, inandığı müəllimi yadında saxlayır, çətin anlarında onun öyrətdiklərindən bəhrələnir. Ona görə də müəllim adı cəmiyyətdə ən şərəfli adlardan biridir. Çin alimi Sin Czı deyib ki, "Biliyə yiyələnməyin ən qısa yolu - müdrik müəllimə səmimi sevgidir".
Müəllimlər gələcəkdə böyük uğurlar qazanan şagirdləri, tələbələri ilə fəxr etdikləri kimi, insanlar da ilk növbədə öz müəllimlərini xatırlayırlar. Bizim cəmiyyətimizin gələcəyi olan gənclərimizin əsl vətəndaş kimi Azərbaycanımıza layiqli övlad kimi böyümələrində məhz vətənpərvər, dilini, tarixni, ədəbiyyatını, mədəniyyətini sevən insanları da müəllimlər yetişdirir.
"Cəmiyyət təhsilsiz inkişaf edə bilməz" - deyən ümummilli liderimiz Heydər Əliyev Azərbaycanın gələcəyinin təhsilin bugünkü vəziyyətindən asılı olduğunu dönə-dönə vurğulamışdır və gənclərə, məktəblilərə tez-tez görüşür, onların uğurları ilə fərəhlənirdi. Və bu gün də siyasi xətt davam edir. Azərbaycan Respublikasının Prezidenti cənab İlham Əliyev tərəfindən həyata keçirilən siyasət göstərir ki, təhsilimizin inkişafına xidmət edən tədbirlər bundan sonra da üzərinə düşən vəzifənin öhdəsindən məsuliyyətlə gələcək, gənc nəslin elmi potensialının artmasında əlindən gələni əsirgəməyəcək.
Əziz müəllimlər!
5 oktyabr - Beynəlxalq Müəllim Günü münasibətilə sizləri ürəkdən təbrik edir, şərəfli və müqəddəs peşənizdə yeni-yeni uğrular arzulayıram. Bayramınız mübarək!

Fatimə Quliyeva
Bakı Biznes və Kooperasiya
kollecinin direktoru

Oxşar xəbərlər