Bakı Dövlət Universiteti (BDU) və M.V.Lomonosov adına Moskva Dövlət Universitetinin Bakı filialının birgə təşkilatçılığı ilə “Böyük Azərbaycan şairi Nizami Gəncəvi və Şərq-Qərb ədəbi-mədəni irsi” mövzusunda dekabrın 23-dən 24-dək beynəlxalq elmi konfrans keçiriləcək.
2021-ci ilin Azərbaycanda “Nizami Gəncəvi İli” elan olunması Nizami irsinin öyrənilməsi, tədqiqi və təbliği istiqamətində yeni imkanlar yaradır. “Böyük Azərbaycan şairi Nizami Gəncəvi və Şərq-Qərb ədəbi-mədəni irsi” mövzusunda beynəlxalq elmi konfrans şairin həyat və yaradıcılığının bütün istiqamətlər üzrə yeni yanaşmalarla tədqiq və təhlil edilməsinə, onun dünyada ədalətin, insanpərvərliyin bərqərar olması ilə bağlı bəşəri çağırışlarının daha dərindən öyrənilib, dünyaya çatdırılmasına kömək edəcək.
BDU-nun Filologiya fakültəsində beynəlxalq tədbirə hazırlıq işləri ilə əlaqədar konfransın yerli Təşkilat Komitəsi üzvlərinin iclası keçirilib. Yerli Təşkilat Komitəsinin sədri Mehriban Əlizadə konfransa tezislərin qəbulunun artıq başa çatdığını, ümumilikdə 150-yə yaxın tədqiqatçının məruzə etmək üçün müraciət etdiyini bildirib.
Qeyd edək ki, konfransda “Nizami Gəncəvi bəşəri ideyalar carçısı kimi”, “Fəlsəfi fikir tarixində Nizami fenomeni”, “Azərbaycan ədəbiyyatında Nizami ənənələri”, “Nizami və tarix”, “Nizami və folklor”, “Nizami və dünya ədəbiyyatı”, “Nizami və türk xalqları ədəbiyyatı”, “Nizaminin ictimai baxışları”, “Nizami irsi dünya mədəniyyəti kontekstində”, “Nizami əlyazmalarının mətnşünaslıq baxımından öyrənilməsi” və s. istiqamətlər üzrə məruzələr dinləniləcək.

Tehsil-press.az