Azərbaycana səfər edən Gürcüstanın təhsil və elm naziri Mixeil Çxenkelinin Bakı Dövlət Universitetində (BDU) əhəmiyyətli görüşləri olub.
Universitet ilə bağlı təəssüratlarını bölüşən nazir “Təhsil TV”nin “Təməl” proqramına müsahibəsində deyib: “Bakı Dövlət Universitetində gürcü dili proqramında oxuyan tələbələrlə tanış oldum və onların gürcü dilini bilməsi məni çox heyran etdi. Şübhəsiz ki, biz daha çox şey edə bilərik. Ona görə də bu proqramı təkmilləşdirməyə töhfə verəcək bəzi gürcü professorları göndərəcəyik. Biz öz tərəfimizdən ən yaxşı mütəxəssisləri seçəcəyik. Eyni zamanda, Tbilisi Dövlət Universitetində Azərbaycan dili proqramının keyfiyyətini artırmaq üçün Azərbaycandan professorlar gələcək.
Biz hazırda Tbilisi Dövlət Universitetində Heydər Əliyev adına auditoriya və kitabxanada hazırlığı başa çatdırırıq. Auditoriya və kitabxananın rəsmi açılışı gələn il – Heydər Əliyevin 100 illik yubileyində olacaq. Biz də qərara gəldik ki, Heydər Əliyevin həyatı və fəaliyyəti ilə bağlı bir sıra tədqiqat seminarlarına start verək. Həmçinin kitab təqdimatları olacaq. Tbilisi Dövlət Universitetində yaratmağı planlaşdırdığımız Azərbaycan Mədəniyyəti Mərkəzi elmi müzakirələr, Azərbaycan dili, Azərbaycan mədəniyyəti, tarixi ilə bağlı akademik proqramlara xidmət edəcək. Hazırda BDU-da fəaliyyət göstərən gürcü dili proqramını genişləndirmək istərdik ki, burada gürcü ədəbiyyatı, mədəniyyəti, gürcü tarixi dərsləri təmsil olunsun”.

Tehsil-press.az