ADA Universitetinin və ABŞ-ın Azərbaycandakı səfirliyinin birgə təşkilatçılığı ilə “İnnovativ məktəb direktorları” layihəsi çərçivəsində “Şagird nailiyyəti – məktəb direktorunun rolu” mövzusunda konfrans keçirilib.
Konfransda məktəb direktorlarının şagirdlərin uğurlarının artırılmasında və inklüziv təlim mühitinin yaradılmasında mühüm rolunu araşdırmaq üçün müəllimlər, tədqiqatçılar və mütəxəssislər bir araya gəliblər.
Açılış mərasimində ADA Universitetinin Təhsil fakültəsinin dekanı Ülviyyə Mikayılova çıxış edərək təhsildə uğurlu nailiyyətlərin əldə edilməsində effektiv məktəb rəhbərliyinin vacibliyini vurğulayıb.
ABŞ-ı təmsil edən nümayəndələrin çıxışlarına əlavə olaraq, təhsil sahəsi üzrə mütəxəssislərin geniş məzmunlu təqdimatları da konfransda yer alıb. Bu təqdimatlar region tələbələrinin ali təhsilə əlçatanlığı, “İnnovativ məktəb direktorları” layihəsinin gedişatı və təsiri, yeni məktəb direktorlarının seçilməsi, hazırlığı, peşəkar inkişafı və ehtiyacları kimi geniş mövzuları əhatə edib.
Daha sonra konfrans panel müzakirələrlə davam edib. “Şagird nailiyyətinin önündə dayanan əngəllər, məktəb direktorlarının gözü ilə. Biz o əngəlləri necə aşa bilərik?” mövzusunda ilk panel regionları təmsil edən məktəb direktorları üçün şagird uğurlarının təşviqində qarşılaşdıqları problemləri müzakirə etmək və bu problemlərə həll yolları təklif etmək üçün platforma təqdim edib.
“Məktəblərdə inklüziv mühit və müsbət mədəniyyət formalaşdırmaq üçün hansı imkanlar və resurslar var?” mövzusunda keçirilən digər panel müzakirədə iştirakçılar müxtəlifliyə dəyər verən, bərabərliyi təşviq edən və hərtərəfli inkişafa dəstək verən yanaşmaların vacibliyini vurğulayaraq öz fikir və təcrübələrini bölüşüblər.
Konfransda, həmçinin ABŞ səfirliyinin təhsil və yüksək inkişaf proqramları və ADA Universitetinin inkişaf və magistr proqramları haqqında məlumat sessiyası baş tutub.
Qeyd edək ki, mayın 26-da ABŞ-ın Kaliforniya Berkli Universitetinin professoru Lihi Rosenthal tərəfindən konfransdan əvvəl seminar keçirilib. Seminarda ABŞ kontekstində nəzəriyyə və nümunələr araşdırılaraq akademik yöndə ən çox geridə qalan şagirdlərin nailiyyət boşluğunu aradan qaldırmaq üçün keçirilən strategiyalar müzakirə edilib.

Tehsil-press.az