Heydər Əliyev Sarayında dünya şöhrətli sənətkar, UNESKO mükafatı laureatı, təsəvvüf ruhlu Xalq artisti Alim Qasımov və Əməkdar artist Fərqanə Qasımova birgə təqdim etdikləri “Şəbi-hicran” tamaşası böyük maraqla qarşılanıb.

Tamaşanın əsas motivləri Füzulinin ölməz əsəri “Leyli və Məcnun” poemasına əsaslanırdı. Bu klassik əsərin obrazları Alim və Fərqanə Qasımovlarla yanaşı, Cavad Nur və Jalə Novruzova tərəfindən də səhnələşdirilib, beləliklə tamaşa iştirakçılarına zəngin və çoxqatlı bir sənət təcrübəsi təqdim olunub.

Tamaşanın quruluşçu rejissoru Əməkdar İncəsənət xadimi Hafiz Quliyev, plastik həllin müəllifi isə Əməkdar artist Bəhruz Vaqifoğlu idi. Onların rəhbərliyi altında səhnələşdirilən kompozisiya muğamın və teatrın dilini mükəmməl şəkildə sintez edərək, Füzuli poeziyasını çağdaş səhnəyə daşıyıb.

İfaları “Qarabağ” orkestri, Əməkdar artist Nərgiz Əliyevanın bədii rəhbərliyi ilə müşayiət edib. Tamaşada tarda Zəki Vəliyev, kamançada Rauf İslamov, nəfəs alətlərində Rəfael Əsgərov və zərb alətlərində Cavidan Nəbiyev çıxış edərək musiqi harmoniyasını tamamlayıblar.

Böyük anşlaqla keçən tamaşada Füzuli poeziyasının Alim və Fərqanə Qasımovların səsində vəhdəti muğam və poeziyasevərlər üçün unudulmaz, bənzərsiz bir mədəni hadisəyə çevrilib. Tamaşa həm vizual, həm də emosional olaraq tamaşaçıları dərin təsir altında qoyub və uzun müddət yaddaşlarda qalacağı gözlənilir.

Tehsil-press.az