Azərbaycan Memarlıq və İnşaat Universitetində (AzMİU) “Dünyanın şah memarlıq əsərləri” adlı yeni və maraqlı fotolayihənin açılış mərasimi olub. İtaliya-Azərbaycan Dizayn Mərkəzi və tanınmış azərbaycanlı peşəkar fotoqraf, incəsənət kuratoru Aydın Sadıxovun təşkilatçılığı ilə həyata keçirilən layihənin açılışında AzMİU-nun rəhbərliyi, professor-müəllim heyəti, tələbələri, Slovakiyanın ölkəmizdəki səfiri Milan Layçak və konsul Mihal Teshlar iştirak ediblər.
Açılış mərasimində İtaliya-Azərbaycan Dizayn Mərkəzinin direktoru Fərid Kərimov çıxış edərək fotolayihə barədə məlumat verib. O, layihənin keçirilməsində əsas məqsədin dünyanın müxtəlif ölkələrinin memarlıq xüsusiyyətləri, tarixi və mədəni irsi, eləcə də dizayn sahəsində yeniliklərlə tanışlıqdan ibarət olduğunu bildirib. “Dünyanın şah memarlıq əsərləri” adlı silsilə fotolayihənin uzunmüddətli nəzərdə tutulduğunu qeyd edən Fərid Kərimov bugünkü sərgidə məharətli fotoqrafın obyektivinə Slovakiya memarlığından tuş gələn incilərin nümayiş olunduğunu deyib.
Universitetin rektoru professor Gülçöhrə Məmmədova çıxışında layihənin fərqli memarlıq nümunələrini öyrənmə, təbliğ etmə baxımından önəminə diqqət çəkib. Slovakiya memarlığının Avropa memarlığında xüsusi yerə sahib olduğunu qeyd edən professor Gülçöhrə Məmmədova bildirib ki, bu layihə AzMİU tələbələrinin, memarlıq üzrə professor-müəllim heyətinin Slovakiya şah əsərləri ilə bağlı daha çox məlumat əldə etməsinə şərait yaradacaq.
Rektor AzMİU ilə Slovakiya Texniki Universiteti arasındakı faydalı əməkdaşlığa toxunaraq layihənin, ümumiyyətlə qarşılıqlı əlaqələrin Slovakiyanın digər ali təhsil müəssisələri ilə də əməkdaşlığa zəmin yaradacağına ümidvar olduğunu bildirib.
AzMİU-da olmaqdan məmnunluğunu ifadə edən səfir Milan Layçak layihənin təşkilinə görə rektora, təşkilatçılara ölkəsi adından təşəkkürünü bildirib, Bakıda, xüsusilə memarlıq təhsili üzrə böyük ənənələrə sahib bir universitetdə Slovakiya memarlığının təbliğini böyük dəyər və iki ölkə arasındakı dostluğun təzahürü kimi qiymətləndirib. Slovakiya, bu ölkənin memarlıq inciləri haqqında məlumat verən səfir AzMİU ilə Slovakiya ali təhsil müəssisələri arasında əlaqələrin inkişafı üçün dəstək göstərməyə hazır olduqlarını qeyd edib.
Fotoqraf və səyyah, sərginin müəllifi Aydın Sadıxov AzMİU rəhbərliyinə və səfirə, eləcə də digər qonaqlara təşəkkür edib və sərgidə nümayiş olunan əsərlərlə bağlı məlumat verib. Müəllif bildirib ki, 20 əsərdən ibarət fotosərgidə Slovakiyanın nadir memarlıq nümunələrinin, o cümlədən Bratislava, Orava, Stara Lubovna, Spis, Beckov, Şaxtice, Devin və Trencin qalalarının əsrarəngiz görüntüləri sərgilənir.
Açılış mərasimindən sonra sərgiyə baxış keçirilib və qonaqlar və səfir Milan Layçakın Slovakiya haqqında maraqlı təqdimatı dinlənilib.
Qeyd edək ki, layihə çərçivəsində dünyanın digər ölkələrinə məxsus memarlıq abidələrinin də fotosərgisinin təşkili planlaşdırılır.

Tehsil-press.az