Prezident İlham Əliyevin 2022-ci il aprelin 20-də görkəmli Azərbaycan şairi və ictimai xadimi Əhməd Cavadın anadan olmasının 130 illiyinin qeyd edilməsi ilə bağlı imzaladığı Sərəncama əsasən respublikada silsilə tədbirlər davam etdirilir. Sərəncamın icrasına uyğun olaraq Azərbaycan Dillər Universitetinin Təhsil 1 fakültəsinin nəzdində Alman dilinin leksikologiyası və üslubiyyatı kafedrasının təşkilatçılığı ilə “İstiqlal sevdalısı – Əhməd Cavad” adlı ədəbi-bədii gecə keçirilib.
Azərbaycan Dillər Universitetinin (ADU) 3 saylı binasının akt zalında təşkil olunmuş ədəbi-bədii gecədə fakültə dekanları, kafedra müdirləri, professor-müəllim heyəti və tələbələr iştirak ediblər.
Tədbir Əhməd Cavadın həyat və yaradıcılığı haqqında tələbələrin maraqlı məlumatları ilə başlanıb. Şairin şeirləri Azərbaycan, alman və rus dillərində səsləndirilib, şeirlərinə bəstələnən mahnılar və rəqslər ifa olunub.
Alman dilinin leksikologiyası və üslubiyyatı kafedrasının müdiri dosent Xuraman Əsgərova istiqlal sevdalısı Əhməd Cavad haqqında maraqlı faktlar söyləyib. Digər çıxış edənlər də Vətən sevdalı şairin həyat və yaradıcılığı haqqında fikirlərini tədbir iştirakçıları ilə bölüşüblər.
Maraqlı çıxışlarına görə tələbələr dekanlıq tərəfindən təşəkkürnamə ilə təltif olunublar.

Tehsil-press.az