Bakı Slavyan Universitetində (BSU) birinci kurs tələbələri üçün “Bir” Tələbə-Könüllü Proqramının təqdimatı keçirilib.
Tədbirdə çıxış edən tərbiyə işləri üzrə prorektor Xanım Sultanova “Bir” Tələbə-Könüllü Proqramının əhəmiyyətini vurğulayıb. Bildirib ki, BSU-nun tələbələri bu proqramın ən fəal iştirakçılarıdırlar. Universitetin 4 mindən çox tələbəsi bu proqrama qoşulub. O, həmçinin universitetin tələbələrinin digər ölkədaxili və beynəlxalq tədbirlərdə fəal iştirak etmələrindən danışıb və onlara gələcək karyeralarında uğurlar arzulayıb.
Tədbirin aparıcısı Kamran Əliyev “Bir” Tələbə-Könüllü Proqramı barədə tələbələrə ətraflı məlumat verib. Qeyd edib ki, “Bir” könüllü olmaq gənclərə beynəlxalq idman yarışlarında və dövlət tədbirlərində yaxından iştirak, tələbəlik həyatını rəngarəng və faydalı keçirmək, komanda ruhunu formalaşdıran kollektiv oyunlarda iştirak, yeni dostlar qazanmaq imkanı yaradır.
Sonra “Bir” Tələbə-Könüllü Proqramının könüllülərinin videoçarxı nümayiş olunub.
“Bir” Tələbə-Könüllü Proqramının nümayəndəsi Mənsurə Məhərrəmova çıxışında bildirib ki, ölkəmizdə genişmiqyaslı tədbirlərin təşkilində və həyata keçirilməsində tələbə-könüllülər böyük rol oynayırlar. M.Musayeva proqram çərçivəsində könüllülər üçün yaranan karyera imkanlarından, Bakı, Gəncə, Sumqayıt, Mingəçevir, Şəki, Masallı və Lənkəran şəhərlərində keçirilən təqdimatlardan danışıb, tələbələri bu layihədə fəal iştirak etməyə səsləyib.
Tədbirdə tələbələrin sualları cavablandırılıb.
Qeyd edək ki, “Bir” Tələbə-Könüllü Proqramı könüllü tələbələrlə işin təşkilinin sistemləşdirilməsi, vahid məlumat bazasının yaradılması, tələbələrin könüllü fəaliyyətlə məşğul olmasının stimullaşdırılması məqsədilə Təhsil Nazirliyinin təşəbbüsü ilə yaradılıb.

BSU-nun Mətbuat Xidməti