Azərbaycan ədəbiyyatının görkəmli nümayəndəsi, böyük şair və dramaturq Hüseyn Cavidin vəfatından 79 il ötür. Bu münasibətlə Hüseyn Cavidin ev-muzeyində anım tədbiri keçirilib.
COVID-19 pandemiyası ilə əlaqədar karantin rejiminin tələblərinə müvafiq olaraq tədbir videokonfrans formatında baş tutub. Anım mərasimində şairin həyat və yaradıcılığını əks etdirən sərgi onlayn rejimdə təqdim olunub.
Muzeyin direktoru, Əməkdar mədəniyyət işçisi, filologiya elmləri doktoru Gülbəniz Babaxanlı ədibin həyat yolundan və zəngin yaradıcılığından söz açıb. Qeyd olunub ki, H.Cavid 1941-ci il dekabrın 5-də Vətəndən uzaqlarda – İrkutsk vilayətinin Tayşet rayonunda 59 yaşında vəfat edib. Ailəsinə isə onun ölümü haqqında şəhadətnamə yalnız 7 il sonra təqdim olunub. Bununla da Cavidlər ailəsi kimi, cavidsevərlər də böyük şairlə qovuşacaqlarına, əsərlərinin yenidən nəşr olunacağına, pyeslərinin səhnədə bir daha tamaşaya qoyulacağına ümidini tamamilə itirib. Hüseyn Cavid 1956-cı il martın 6-da Azərbaycan SSR Ali Məhkəməsinin hökmü ilə bəraət qazansa da, uzun müddət ədibə sovet mundiri geyindirilib, əsərləri seçilərək səhnələşdirilib, böyük mütəfəkkirin əsas qayəsi arxa planda gizlədilib, dili və üslubu dəyişdirilərək təqdim olunub.
G.Babaxanlı çıxışında H.Cavidə əsl bəraətin dahi şəxsiyyət Heydər Əliyev tərəfindən verildiyini vurğulayıb. Diqqətə çatdırıb ki, şairin nəşi məhz Ulu Öndərin səyi nəticəsində uzaq Sibirdən Azərbaycana – öz doğma Vətəninə gətirilib. Ədibin adının əbədiləşdirilməsi istiqamətində də ilk və qəti addımlar Heydər Əliyevin Azərbaycana rəhbərlik etdiyi illərdə atılıb. Ümummilli Liderin göstərişləri sayəsində H.Cavidin Bakıda və Naxçıvanda ev-muzeyləri yaradılıb, Naxçıvandakı məzarı üzərində məqbərəsi ucaldılıb.
Qeyd edək ki, anım mərasiminə qatılan tanınmış cavidşünas və cavidsevərlərə muzeyin 2020-ci ildə çap olunan son nəşrləri onlayn rejimdə təqdim olunub.

Tehsil-press.az