İran-Azərbaycan parlamentlərarası dostluq qrupunun sədri Salman Xodadadi və İranın Azərbaycandakı səfirliyi nəzdindəki İran Mədəniyyət Mərkəzinin rəhbəri İbrahim İbrahimi Bakı Dövlət Universitetində olublar. Qonaqlar BDU-nun laboratoriyaları, o cümlədən Nanotexnologiya Mərkəzinin fəaliyyəti ilə tanışlıqdan sonra rektor, akademik Abel Məhərrəmovla görüşüblər. Rektor İran-Azərbaycan münasibətlərindən, o cümlədən İran İslam Respublikasının bir sıra universitetləri ilə uğurlu əməkdaşlıq əlaqələrindən bəhs edib, nonotexnologiya və biotexnologiya sahəsində birgə tədqiqatların aparılmasından, dərsliklərin hazırlanmasından danışıb.
Qonaqlar BDU-da olmaqlarından məmnunluqlarını ifadə edərək Azərbaycanda bütün sahələrdə olduğu kimi elm sahəsində də sürətli inkişafın şahidi olduqlarını, İran İslam Respublikası universitetlərinin BDU ilə elmi müstəvidə işlərin genişləndirməsinin əhəmiyyətini qeyd edərək ölkələrarası elm və təhsil sahəsində həyata keçiriləcək bütün layihələri dəstəkləməyə hazır olduqlarını bildiriblər. Görüş qarşılıqlı maraq doğuran məsələlər ətrafında fikir mübadiləsi ilə davam edib.

Mətbuat və informasiya şöbəsi