Tədbirdən öncə universitetin rəhbərliyi, məzunları və fəal tələbələri Fəxri Xiyabanda xalqımızın Ümummilli lideri Heydər Əliyevin məzarını və Şəhidlər Xiyabanında uyuyan qəhrəman Azərbaycan övladlarının məzarlarını ziyarət etdilər.
Sonra isə universitetin həyətində "Məzun günü" təşkil olundu. Müstəqil Azərbaycanın dövlət himninin səsləndirilməsindən sonra açıq elan olunan tədbiri giriş sözü ilə Azərbaycan Kooperasiya Universitetinin rektoru, Millət vəkili, professor Eldar Quliyev davam etdirdi.
E.A. Quliyev bildirdi ki, universitetimizi 1100-ə qədər tələbə bitirərək ali təhsilli vətəndaş adını almaq üzrədir. Həmin tələbələr müstəqil Azərbaycanın dövlət və özəl müəssisələrində çalışaraq, Azərbaycanımıza, dövlətimizin maraqlarına xidmət edəcəklər. 4 il ərzində aldıqları ali təhsili həm nəzəri, həm də praktik cəhətdən nümayiş etdirməklə savadlı mütəxəssis olduqlarını sübut edəcəklər. Şübhəsizdir ki, mənim də rektor kimi ən böyük arzumdur ki, tələbələrimiz universiteti bitirdikdən sonra ən yüksək səviyyədə fəallıq göstərsinlər, müəllimlərinin, bizlərin etimadını doğrultsunlar. Əminəm ki, bu belə də olacaqdır. Bu gün Azərbaycanda gənclərin hərtərəfli inkişafı üçün istənilən zəruri şərait yaradılmışdır. Azərbaycanda gənclərə dövlətin göstərdiyi diqqət və qayğı ən yüksək səviyyədədir. Bu, danılmaz faktdır. Məhz bu qayğının nəticəsidir ki, gənclər həm ölkə daxilində, həm də beynəlxalq aləmdə böyük uğurlar qazanmışlar. Azərbaycan gəncliyi dövlətin ona göstərdiyi diqqət və qayğını hər zaman yüksək qiymətləndirir və buna layiq olmağa çalışır. Müasir gəncliyin məsuliyyəti böyükdür. Müstəqil Azərbaycanımızı göz bəbəyi kimi qorumaq və onun müstəqilliyinin əbədi olmasını təmin etməkdir. Hər bir ölkədə dövlətçiliyin, müstəqilliyin daha da möhkəmləndirilməsi gələcəyin etibarlı təminatı olan intellektual səviyyəli potensial kadrların yetişdirilməsindən, gənclərin cəmiyyətin bütün sferalarında iştirakından, onların aparıcı qüvvəyə çevrilməsindən çox asılıdır. Məhz, Ulu Öndər Heydər Əliyevin bünövrəsini qoyduğu siyasətin uğurlu davamının nəticəsidir ki, bu gün gənclərimiz ölkənin ictimai-siyasi həyatında aktiv iştirakla bərabər beynəlxalq miqyasda da uğurları sıralayırlar. Gənclərlə iş sahəsində görülən tədbirlər Azərbaycan gəncliyinin inkişafına təkan vermiş, onların cəmiyyətdə özlərini təsdiq etməsində böyük rol oynamışdır. Son illər gənclərin ölkənin mədəni, ictimai-siyasi, iqtisadi həyatında fəallığının artması ortaya qoyulan konsepsiyanın müvəffəqiyyətlə icrasının göstəricisidir. Gənclər artıq müşahidəçi qismindən çıxaraq, birbaşa proseslərin iştirakçısına çevriliblər. Heç şübhəsiz ki, ölkədə müəyyən bir sferanın inkişafı üçün həmin sahənin qanunla tənzimlənməsi şərtdir. Azərbaycanda gənclər siyasətinin əsas istiqamətləri "Gənclər siyasəti haqqında" qanunla müəyyənləşdirilib. Sənəddə gənclərin mənəvi-əxlaqi tərbiyəsi və mədəni həyatda iştirakı, istedadlı gənclərə dövlət qayğısı, onların sağlamlığının qorunması və fiziki inkişafı, məşğulluğun təmin edilməsi, gənc ailələrə və gənclər təşkilatlarına dövlət yardımı kimi vacib müddəalar əksini tapıb. Düzgün siyasətin nəticəsidir ki, artıq Azərbaycan gəncliyi cəmiyyətin inkişafında fəal sosial təbəqəyə çevrilib. Sabah ölkəmizdə 28 may Respublika günü də qeyd olunacaqdır. Fürsətdən istifadə edib, bu gözəl bayram münasibətilə də hər birinizi təbrik edirəm. Tanrı Azərbaycanı qorusun!
Sonra çıxış edən gənclər, Tələbə Gənclər Təşkilatının sədri Tamerlan Əkbərov, İqtisadiyyat fakültəsinin IV kurs tələbəsi Lamiyə Muradova, Marketinq və menecment fakültəsinin IV kurs tələbəsi Nəcibə Həsənova bildirdilər ki, təhsil aldıqları müddət ərzində universitetdə yalnız qayğı ilə təmin olunmuşlar. Yaradılmış şəraitə görə tələbələr universitetin rektoruna dərin minnətdarlıqlarını ifadə etdilər.
Mətbuat və İnformasiya Şöbəsi
.jpg)
