ABŞ-ın xüsusi prokuroru Robert Müller Moskva ilə Donald Trampın seçki qərargahı arasında sözləşmənin olmadığını təsdiq edib.
Bu barədə Robert Müller tərəfindən aparılan araşdırmanın yekunu üzrə hazırlanan hesabatda qeyd olunub.
Bu sənəddə öz əksini tapan əsas fikirləri bazar günü eyni zamanda Baş Prokurorluq funksiyasını yerinə yetirən ABŞ-ın Ədliyyə Nazirliyi dərc edib.
Ədliyyə naziri Uilyam Barr isə bu fikirləri özündə əks etdirən məktubu Konqresin, Senat və Nümayəndələr Palatasının hüquq komitələrinin rəhbərlərinə göndərib.
"Xüsusi prokurorun araşdırması zamanı əldə edilən sübutlar prezidentin cinayət törətməsi və ədalət məhkəməsinə maneəçilik etməsini müəyyənləşdirmək üçün yetərsizdir", - deyə məktubda qeyd olunub.
Sənəddə bildirilir ki, "araşdırma Trampın seçki kampaniyası iştirakçılarının Rusiya ilə sözləşməyə girməsi və ya müdaxilə üzrə hərəkətləri əlaqələndirməsini aşkar etməyib".
Bu arada Donald Tramp xüsusi prokuror Robert Müller tərəfindən "Rusiya işi" üzrə aparılan araşdırmanın nəticəsini qiymətləndirib.
O bu barədə "Twitter"də yazıb: "Heç bir sözləşmə, heç bir əngəl, tam və mütləq bəraət. Amerikanı böyük saxlayaq!”.

Tehsil-press.az